RESUBELPARA: North Garo Hills a·jao lekka pora donge, kam gri ong·e dongenggipa chadamberangna North Garo Hills a·jani District Administration, District Employment Exchange baksa nangrime Job Mela-ko December-ni 2 tariko, Resubelpara-ni Dekachang Field-o ong·atenga.
Ia Job Mela-ko Chief Minister-ni Career Guidance Scheme-ni ning·o, pring 10:00 bajioni ong·atenga aro ian lekka pora donggipa chadamberangna, dingtang dingtang company-rang baksa agangrike, an·tangtangna janggi tangani cholrangko dake ra·na namgipa chol ong·enga.
Ia Job Mela-ko ong·atanio bak ra·na sienggipa company-rangara, Mendipathar-ni HDFC Bank, Resubelpara-ni State Bank of India (SBI), Mendipathar-ni Varun Beverages Pvt Ltd, Mendipathar-ni Eastern Silicon Pvt Ltd, Assam-ni Confederation of Indian Industry (CII), The Beginners (feat. Barbeque Nation & Teleperformance) aro Shillong-ni Greta Solutions ong·enga.
Ia Job Mela-o bak ra·na re·baenggipa candidate-rang, an·tangtangni CV/Resume-rangko, poraiani pilak certificate-rang aro kamni certificate-rangko ra·e, spot interview-na tarijoke re·bana nanggen ine official-rang u·iataha.
