SHILLONG: Dokgipa Meghalaya Saras Aajeevika Fair 2025-ko Sombar salo, a·dokni Chief Minister Conrad K Sangma, Shillong songjinmani U Soso Tham Auditorium-o a·bachengate on·angaha aro ia Saras Fair-ko a·bachengatanio, a·dokni Community & Rural Development (C&RD) Minister Sosthenes Sohtun, dingtang dingtang official-rang aro a·dokni self help group (SHG)-rangba bak ra·angtokaha.
Ia program-ko a·bachengatanio a·dokni Chief Minister, tom·bimonganio bak ra·giparangna aganprakangengon, ia program-ara a·doko self help group (SHG)-rangni chu·sokgipa ong·aniko manianiba ong·enga ine parakataha.
“Self help group-rangko kulianichi songni nokni me·chikrang, rakbee kamrangko ka·e, an·tangtangnasan ong·aigija songni nokni gipinrangnaba janggi tangani cholrangko on·engani gimin SHG-rangko bikotaniara a·doko dingtanganiko ra·baani mingsa chol gita ong·aha,” ine Chief Minister aganaha.
SHG-rangni chu·sokgipa ong·engani gimin janapangengon, scheme-rangchisan ong·aigija me·chikrang, bading chiwalgiparang, game ge·e cha·giparang aro chadamberangni janggi tanganio dingtanganiko ra·bana gita sorkari, dingtang cholrangchiba kamrangko ka·ahani gimin da·alo dingtanganiko nikna man·engaha ine Chief Minister parakataha.
“Ia salni program-ara economy-ni dal·roroanikosan mesokani ong·ja indiba SHG-rangni mongsonggipa daitoko jako ra·ani aro SHG-rango kam ka·enggipa me·chikrangni chu·sokaniko manianiba ong·engani gimin anga namen kusi ong·a,” ine ua aganaha.
SHG-rang a·doko dol 55,000 gapengaha ine SHG-rangni dal·rorobaaniko nipilatengon, SHG-rangni dal·rorobaaniara janggi tanganiko dingtangatna ja·ku de·ani giminsan ong·ja indiba a·doko an·o donggipa me·chikrangni sianirang bilongengmiting somoio ma·giparangni janggirangko jokatna kam ka·ani a·selba ong·aha ine Sangma parakataha.
A·doko economy dal·roroengaha ine janapangskaengon, Meghalaya a·dokba India a·songo ta·rakbatsrange economy dal·roroenggipa a·dokrangoni gnigipa ong·enga aro ia pilakan bading chiwalani kamrango sorkarini tangka paisarangko koros ka·ani gimin ong·a ine Chief Minister aganaha.
Ia program-ko ong·atanio, a·dokni Chief Minister aro gipin dilgiparang, je songrangon anganwadi centre-rang aro village organization-rang dongja, uandakgipa biaprango an·o donggipa me·chikrangna Transit Home-rangko kulie dakchakahani gimin songni nokni manderangna dingtangmancha mande ra·pilskaanikoba dakangaha.
Har Ghar Tiranga Campaign-o an·tangtangko on·kange kam ka·gipa sak 15 volunteer-rangnaba ia tom·anio certificate-rangko sualataha.
