BAGHMARA: Baghmara Civil Hospital-ni doctor-rangko dingtang dingtang biaprangona ra·jitangani ja·man ia hospital-na da·alona kingkingan doctor-rangko on·skakujaenga ine South Garo Hills a·jani social activist Greneth Sangma, a·dok sorkariko matnangataha.
Sangma-ni parakatani gitade, ua an·tangan ia hospital-ona re·ange, hospital-o doctor-rang chu·ongjaengani a·sel saenggiparang aro kamko ka·enggipa doctor-rang neng·nikanirangko chagrongna nangtokenga ine nikna man·ahachim.
“Ia hospital-o doctor aro nurse-rang chu·onga gitan donga ine agananide lekkarangosan ong·aia indiba hospital-ona re·ange nigenchimode, OPD-ko nirokenggipaba doctor saksasan, Sonography-ko nienggipaba doctor saksasan aro walni somoio kam ka·enggipa doctor-ba saksasan,” ine Greneth Sangma parakataha.
Da·o dipet Baghmara Civil Hospital-o diploma donggipa doctor sakgni, general medical officer saksni aro maming ostro gri adita sak specialist doctor-rangsan dongaia ine janapatengon, ia hospital-ni doctor aro nurse-rangko gipin biaprangona apjitangaonin hospital-o doctor aro nurse-rang chu·onggija kamko ka·na nangtokenga ine Sangma parakataha.
Sangma-ni parakatani gitade, Baghmara Civil Hospital-ni doctor sakbri aro nurse sakbriko Williamnagar aro dingtang dingtang district headquarter-rangona ra·jitangaha indiba ia doctor-rangni pal gipin doctor-rangko on·skakujaenga.
Medical Central Board-ni niam gitade, hospital-o senior medical officer sakbonga aro specialist doctor sak 10 dongna nangachim indiba Baghmara Civil Hospital-ode senior medical officer aro specialist doctor-rangba dongimin niam gita ong·jaenga ine Sangma parakataha.
