TURA: National Highway (NH-127B) ramana ra·gipa biapni tangka paisarangko oke ra·a ine matnangatenba, All Meghalaya Minority Students Union (AMMSU)-ni president Nur Islam aro uni pagipa Abul Kashem Sk-ni kosako union-ni membor-rang, FIR ka·doangaha.
FIR-ko AMMSU-ni treasurer Monirul Islam ka·aha aro uni FIR-o janapatani gitade, da·o tarienggipa NH-127B ramana New Bhaitbari-o donggipa AMMSU-ni a·a aro office-na sorkari, gong 21,29,446 tangkako gamahachim. Indake ong·genchimoba, AMMSU CEC-na u·iatchenggija, ia tangkarangko union-ni president, an·tangni aro pagipani account-o chipe ra·aha ine FIR-o matnangataha.
“Iandake office-ni tangkarangko AMMSU-ni executive committee ba general body baksa agangrikchenggija, an·tangni aro pagipani account-o chipe ra·aniara, AMMSU-ni aro sorkarini dongimin niamrangko pe·ani gita ong·aha. AMMSU-ni Work Completion Report-oba CMSDF-ni ning·o gong 5,96,000-ni receipt-kosan mesokaiahani gimin NH-127B ramana gamgipa tangkarangko union-ni maming kamrangna jakkaljaha ine mesokani ong·aha,” ine AMMSU-ni treasurer, FIR-o parakataha.
Islam-ni FIR-o janapatani gitade, ia tangkarangko sorkari, AMMSU office-ni bimingosa gamahani gimin tangkarangko union-ni official bank account-osa chipna nangachim indiba union-ni president, union-ni gipin dilgiparang baksa agangrikchenggija, an·tangni aro pagipani account-osa chipskaaniara niamko pe·ani gita ong·aha.
