SHILLONG: Meghalaya sorkari nangana bate tangka paisarangko ra·sroengani gimin mikkangchi a·dok gro-jinang nangnasienga ine Congress dolni mikrakataniko on·ani ja·man, ia ra·srogipa tangka paisarangoni 72 percent-kode ma·mong sorkarisa gamgen aro 28 percent-kosan a·dok sorkaride gamna nangaigen ine a·dokni Chief Minister Conrad K Sangma talataniko on·angskaaha.
Meghalaya a·dokni tangka ra·sroani GSDP-oni 40 percent gapenga ine Congress dolni matnanganina aganchakaniko on·angengon, darang a·dokan dongimin niamna bate tangka paisarangko ra·srona man·jana gita India sorkari, Finance Ministry aro Reserve Bank of India-o dongimin niamrang donga ine Chief Minister parakataha.
“Chingni tangka paisa ra·sroaniara dongimin niam gita ong·aienga,” ine Sangma aganenba, Meghalaya a·dokni dal·roroanina jakkalenggipa tangka paisarangoni 70 percent-de a·dokni internal revenue-onin re·baenga ine parakataha.
ADB aro World Bank-ni loan-rangde 80:20 ratio-osa ong·a ine janapatskaengon, ia loan-rangoni 20 percent-kosan Meghalaya a·dokde gamna nangaigen ine Chief Minister talataniko on·angaha.
“80 percent loan-oni 90 percent-de ma·mong sorkarini on·enggipasa ong·a aro Meghalaya sorkaride 10 percent-kosan gampilna nangaia. Chu·gimik hisapko niatgenchimode, 72 percent-ko ma·mong sorkari gamenga aro 28 percent-kosan a·dok sorkaride gamna nangaia,” ine Sangma aganaha.
Manderangko dilsretna jotton ka·enga ine Meghalaya Congress-ni president Vincent Pala-ko matnangatengon, a·dokni dal·roroaniko amchakpajaesa Congress dol, manderangko dilsretna jotton ka·skaenga ine Sangma parakataha.
Meghalaya sorkarini tangka paisarangko ra·sroani da·o a·dokni GSDP-o 40 percent ong·pilengahani gimin mikkangchi Meghalaya a·dok, gro-jinang nangna sienga ine adita salrangna skangsan, Pala mikrakataniko on·angahachim.
A·songni GSDP-na tangka ra·srona gita dongimin niamara 28 percent-san ong·aiachim indiba tangka paisarangko ra·sroanio Meghalaya sorkari nangana batangengaha ine Pala matnangataha.
“An·ching iandake tangka paisarangko ra·srogenchimode maikai tangna man·gen?” ine Pala sing·doatenba, Meghalaya a·dok ning·o kajinarangko gile man·aniara kror 4000-mang ong·a aro kajinarangni on·gilaniara kror 9000-mang ong·a ine Pala parakataha.
“Bangkikode an·ching ma·mong sorkarini ka·sachakaniosa pangchakenga. Da·alp Meghalaya sorkari, External Agency-rangoniko dollar-prako gong 85-86 ka·e tangka paisarangko ra·sroenga indiba adita somoirangni gisepon ia dollar-sani dam gong 100 ong·gnok,” ineba MPCC president aganaha.
