TURA: Dainadubi-Darugre-Williamnagar jolrango, National Highway (NH-127B) ramana ra·gipa a·ani tangka paisarangko a·a nokgiparang man·tokkujae neng·nikanirangko chagrongna nangtokenga ine Niksamso Garo Community Organisation (NGCO) parakatenba, a·a nokgiparangna ta·raken tangka paisarangko gamchina sorkariko didiataha.
NGCO-ni parakatani gitade, ia ramani samba jolrango songdongenggipa manderang, batanggimin bilsi 50-na dokkanrangko aro nokrangko rike janggi tangtokpaengachim aro a·a nokgiparangoni mitamko 3D compensation notification-o segatahaoba da·alona kingkingan an·tangtangni man·na nangenggipa tangka paisarangko man·tokkujaenga.
“Ia a·a nokgiparangoni bang·batan an·tangtangni bagan barirangna tangka paisarangko man·tokkujaengani gimin Revenue Department-o badi ka·doahachim indiba uamangni neng·nikanirangko knachakjaengani a·sel a·a nokgiparang, cholgri ong·na nangtokenga,” ine NGCO parakataha.
PWD ramasamrango donggipa a·arangko sorkarini a·arang ine a·kangenba, a·a nokgiparangna tangka paisarangko gamna jechakenga ineba NGCO matnangataha.
Indake ong·engon, Rongmil jolrangko man·chape Dainadubi-Darugre-Williamnagar jolrango NH-127B ramana an·tangtangni bagan barirangko on·na nanggipa a·a nokgiparangni man·na nanggnirangko ta·raken hisaptaichina aro tangka paisarangko gamchina gita NGCO didiataha.
