SHILLONG: Brigipa changna Shillong songjinmani Ward’s Lake-o ong·atenggipa Tri Hills Ensemble-ko Budbar salo, a·dokni Chief Minister Conrad K Sangma, a·bachengate on·angaha aro ia program-ko a·bachengatanio, a·dokni Arts & Culture Minister Sanbor Shullai, a·dok sorkarini Advisor Paul Lyngdoh, a·dokni Chief Secretary Dr Shakil P Ahammed aro dingtang dingtang official-rangba bak ra·angtokaha.
Ia Tri Hills Ensemble-o Meghalaya a·dokni dolgittam jatrang, chong·motan, Khasi, Jaintia aro Garorangni dingtang dingtang sika koanio, changa sapani aro daka rikanirangko mesokna bilsiantian ong·atrongenga.
Ia Tri Hills Ensemble-ko a·bachengate on·anganio a·dokni Chief Minister, jinmana aganprakangengon, ia manianiko ong·atanichi jatni daka rikanirangko a·gilsakna mesokna cholko man·enga ine ia Tri Hills Ensemble-ko ong·atengani gimin Arts & Culture Department-ko mittelpilangaha.
A·dokni namroro silroroani baksana jatni daka rikanirangko ripingna aro tang·doatna nangengani giminba ua aganangaha.
Jatni daka rikanirangko nambate see rakkina nangengani gimin janapangengon, “A·chikrangni Wangala chrokanio dama dokanirangba dingtang dingtang rokomrang donga aro iakode dama dokgiparangsan ma·siaia indiba da·alona kingkingan ia dama dokani rokomrangko see rakkianirang dongkujaenga,” ine Sangma aganaha.
Pa Togan Nengminja, U Tirot Sing aro Kiang Nangbah-ni janggi tanganirangko dakmesokchina gitaba Chief Minister, dingtang dingtang skulrangko didiangaha.
Ia Tri Hills Ensemble-ko a·bachengatanio Meghalaya Culture & Cuisine Award aro Heritage Award-rangkoba a·dokni Chief Minister aro gipin dilgiparangni jakchi on·angaha.
