W’nagar-o gital dake taritaigipa Soil Lake project-ko CM kulie on·a

WILLIAMNAGAR: East Garo Hills a·jani Williamnagar-o gital dake taridapgipa Soil Lake Eco-Tourism Project-ko Sukrobar salo, a·dokni Chief Minister Conrad K Sangma, kulie on·angaha aro ia project-ko kulie on·anio, a·dokni Soil & Water Conservation Minister Marcuise N Marak baksana dingtang dingtang official-rangba bak ra·angaha.
Ia Soil Lake-ko Nengsang River Valley Project (RVP)-ni ning·o gital dake taridapaha aro ia wariko nambatate tarianichi, ian Williamnagar-o Tourism-ko tang·doatan baksana jillako nitobatataniba ong·enga.
Ia gital dake taridapgipa Soil Lake-ko Williamnagar jolo songdongenggipa manderangna pakwate on·angengon, ia wariko nitobatate tarianiara Williamnagar jillako nitobatatna aro ia biaprangko name rakkina ja·ku de·ani ong·enga ine a·dokni Chief Minister parakataha.
Samtangtango ong·telaigiparangko ripinge rakkianio Soil & Water Conservation department-ni kamrangni gimin janapangengon, ia kamrangna ua dingtangmancha department-ni minister aro official-rangkoba mittelpilangaha.
Ia sal somoirango a·gilsako ding·a sin·anirang dingtangroroenganichi, a·dokni pilak biaprangon chiring chibisikrang aro chibolrang tiprorona a·bachengengaha ine janapatengon, iarangni nangchakaniko da·o nikna man·kujaengoba, da·o bilsi 10-ni gisepon bang·a neng·nikanirangko chagrongna nangnaba dongaha ine Chief Minister, mikrakataniko on·angaha.
Samtangtango ong·telaigiparangko chel·chakna gita Soil & Water Conservation department, dingtang dingtang ja·kurangko de·enga indiba a·dokni dingtang dingtang biaprango, mongsongbate songadam nokadamrango donggipa chiring chibisik aro warirangko chel·chakna gita kamrangko bilakbatatna nangkuenga ineba Chief Minister aganaha.
Ia sorkari, darangnaba mikkang niteani grian, pilak biaprangon, pilak torom aro jatrangnan namroro silroroaniko ra·bana kam ka·enga ineba Chief Minister aganaha.
Ia tom·anio, Soil & Water Conservation Minister Marcuise N Marak-ba jinmana aganprakengon, a·dokni pilak biaprangon namroro silroroaniko ra·bana kam ka·enga ine a·dokni Chief Minister Conrad Sangma-ko mittelpilangaha.
Ia Soil Lake Eco-Tourism project-ko chu·sokatna man·ahani gimin ua dingtangmancha a·dokni Chief Minister aro Soil & Water Conservation department-ni dingtang dingtang official-rangkoba mittelpilangaha.