SHILLONG: Enforcement Directorate (ED), Shillong Sub-Zonal Office, investment scam ba tangka bote cha·bokani mamlao a·dokoni kror 17.91 gamko mamlao chapataha. Pearlvine International-ni ning·o website www-pearlvine.com-ni gita Shillong-oni operate ka·gipa ba chalaigipa investment fraud ba cha·bokaniko meja December 10 tariko Prevention of Money Laundering Act (PMLA) 2022-o chapataha.
ED-ni parakani gita, ra·sekgipa gamrango ming 13 jitatna man·gijagipa aro ming 7 jitatna man·gipa gamrang ong·a. Unbaksana dam rakgipa garirang dongpaa. Jekon scam ba cha·bokani tangkachi breaha.
Reserve Bank of India (RBI), Shillong-ni badi ka·doanio CID, Meghalaya Police FIR-ko segataha, uo pangchake am·sandianiko a·bachengaha.
Indian Penal Code-ni dingtang dingtang section-rango pangchake scheme-o cha·bokanio jak donggiparangni kosako mamlako segataha.
Pearlvine International, jean an·tangko U.S-ni entity ba company ine janapa, ua company, investment ba tangka botgiparangna ‘high return’ ba man·dapaniko bang·e on·na ku·chaka. Komigipan memborship fee -an gong 2,250 ong·a.
Batanggimin bilsi 2018 aro bilsi 2023 March jani gisepo ia group a·songni gimik bakrangon Ponzi scheme-ko chalaiaha. India aro Thailand-rango seminar-rangko ong·ate gital memborrangko sandiaha. Bilsi 2022-o India-onikon lak 80 memborrangko man·aha ine organisation parakaha.
ED officer-ni parakani gita ia scam-ko Neeraj Kumar Gupta-na ja·pang-ja·diloni a·bachengdilgipa ong·a. Bilsi 2015 November jao pearlvine.com-ko breaha. Gupta, India aro Thailand-o promotional seminar-rangko ong·ataha. Organisation-ni website design-ko Parvesh Saroha nirokaha, uni kror 7.82 -ni gamrangko mamlao chapataha.
Pearlvine International, komibeoba investor-rangoniko kror 1,575-ko man·aha, jeoni kror 395.35-kode on·piljaha. Niamgri tangka chimonggiparangko a·a aro gipin gamrangko invest ka·aha.
Kror 17.91 -ni gamrangko chapate ED, da·odipet ia case-o chu·gimik kror 54.98-ni gamrangko mamlako chapataha. Ia mamlako sandikuenga.
