SHILLONG: Meghalaya a·doko Inner Line Permit (ILP)-ko ra·gatchina gita ma·mong sorkariko didie, bilsidokna skangan Meghalaya Legislative Assembly-o resolution-ko pass ka·manahaoba da·alona kingkingan ILP-ko ra·gatani bidingo ma·mong sorkarioni maming talatanirang dongkujaengani gimin Robibar salo, Khasi Students Union (KSU) suk ong·gijaniko parakataha.
KSU-ni president Lambokstarwell Marngar-ni parakatani gitade, ILP-ko ra·gate on·china gita KSU, changni chang dabianirangko dake jingjengatahaoba da·alona kingkingan India sorkarioni maming aganchakanirangko knasona ba nikna man·kujaenga.
ILP-na Meghalaya Legislative Assembly, 2019 bilsini December 19 tarikon resolution-ko pass ka·ahachim.
“ILP-ko ra·gate on·china chinga changni chang dabiaha aro jingjengatanirangkoba dakaha indiba Meghalaya Assembly-o ILP-na resolution-ko ra·aoni bilsidokni ja·manba ILP-ko ra·gatani bidingo ma·mong sorkarioni aganchakaniko man·kujaenga,” ine Marngar aganaha.
“Da·o dipet iani bidingo a·dok aro ma·mong sorkari dolgnionikon name talatanirangko man·kujaengani gimin ian a·dok sorkarini gisik nangteljaengani giminsama ma ma·mong sorkarian ILP-ko on·na sikteljaenga, chinga ma·sina man·kujaenga,” ineba KSU president parakataha.
ILP-ni bidingo KSU, India sorkarini minister-rang baksa agangrikna jotton ka·ani ja·manoba maming aganchakanirangko man·kujaenga ineba ua aganaha.
Meghalaya a·doko 2016 bilsionin ra·gatgipa Meghalaya Residents Safety & Security Act (MRSSA)-ni bidingo janapatskaengon, ia niamko name ja·rikna ja·ku de·ani bidingo a·dok sorkari talatanirangko on·kujaenga ine KSU president matnangataha.
“Iani bidingo chinga sing·a changantian, iako India sorkari nipiltaikuenga inesan a·dok sorkari aganchakrongaia,” ine Marngar aganaha.
Meghalaya a·doko ILP aro MRSSA-ko ra·gatna gisiko nangjaenganiara, a·doko songdongenggipa Tribal manderangko chel·chakna gisik nanggijaniko mesokani gitasa ong·enga ineba Marngar aganaha.
ILP-ko ra·gatani bidingo maming talatani dongkujaenganina KSU suk ong·ja
Date:
Share post:
