TURA: East Garo Hills a·jani Samanda Block ning·o donggipa Chimagre Songgital jolrango mobile network namjae, jolo songdongenggipa manderang, mongsongbate chatro chatrirang aro ma·a paarang neng·nikanirangko chagrongna nangtokenga ine Garo Students Union (GSU) Nengkra regional unit parakatenba, ia songo mobile tower-ko songe on·china a·dokni Chief Minister Conrad K Sangma-ko didiataha.
GSU Nengkra regional unit-ni parakatani gitade, East Garo Hills a·jani Samanda Block ning·o donggipa Chimagre Songgital jolrango, mobile network-rangko name man·jaengani a·sel, chel·a biaprangona phone ka·na nangan somoirango agangrikna man·jae aro internet-rangko name man·jae, dingtang dingtang kamrangko ka·e cha·enggipa manderang, mongsongbate chatro chatrirang, an·tangtangni nangchongmotgipa kamrangko ka·na man·tokjaenga.
“Ia jolo mobile tower-ko songe on·genchimode, dingtang dingtang biaprango donggipa manderang baksa nambate agangrikna cholrangko man·gen aro internet-ko nambate man·anichi, ian chatro chatrirangnasan ong·aigija pilak kamrangon namen dakchakani ong·gen,” ine GSU Nengkra regional unit-ni president Ringrang M Sangma parakatenba, Chimagre Songgital jolo mobile tower-ko songe on·china a·dokni Chief Minister-ko mol·molataha.
