Medical college, nursing college-rangko kulidapchina Tura MP didia

NEW DELHI: Meghalaya a·doko doctor aro nurse-rang chu·ongjaengani a·sel, a·doko songdongenggipa manderang neng·nikanirangko chagrongna nangenga ine Sombar salo, Tura-ni Conrgress MP Saleng A Sangma, medical college damgni aro nursing college damgniko kulidape on·china ma·mong sorkariko didiangaha.
Lok Sabha-o Rule 377-ni ning·o an·tangni nangnikaniko janapangengon, Meghalaya a·doko specialist doctor-rang, nurse-rang aro gipin kamko ka·giparang chu·ongjaengani a·sel, sanna bananirangko on·anio neng·nikanirangko chagrongna nangenga ine Sangma parakataha. Iani bidingo Union Health Minister, Tura-ni MP aro Lok Sabha Secretariat-na jasani gisepon aganchakaniko on·na ku·rachakangaha.
Ia Rule 377-ni ning·o Parliament-ni membor-rang, gipin kamrango gita niamrangko ja·rikna nangjachim.
Meghalaya a·doko sanna banani kamko ka·enggiparang, mongsongbate specialist doctor-rang aro nurse-rang chu·ongjaengani a·selan songadam nokadamrango manderangna sanna bananirangko on·anio neng·nikanirangko man·na nangengachim.
A·dokni dingtang dingtang health centre-rango, mongsongbate songadam nokadamrango aro district hospital-rango kam ka·gipa doctor-rang chu·ongjaengani gimin batanggimin somoirangonin manderangni badi ka·anirangkoba nikna man·engachim.