TURA: Talent Hunt season-14 ko Sukobar saloni West Garo Hills a·jani, Tura District Auditorium-o ong·atanggen. Ian Chief Minister Special Grant, Directorate of Art & Culture, Sports & Youth Affairs, District Administration West Garo Hills Tura, Meghalaya Co-operative Apex Bank Ltd. aro State Bank of India-ni gita dakchakanichi, Garo Hills Talent Hunt Development Society-ni gita ong·atenggipa program ong·a.
Ian dingtangmancha a·dokni chadamberangna an·tangtangni changa sapanirangko mesokna cholko on·ani aro mikkangchi chadamberangni changa sapanirangko namdapatna miksonge ong·atenggipa programba ong·enga.
Ia talent hunt-ko ong·atanio, a·dokni dingtang dingtang gadang aro bewalrango changgipa sapgipa chadamberangna susaaniko ong·atanggen aro nambatgiparangna dingtang dingtang boksisrangko on·an baksana, batangimin bilsirangni gisepo a·doko corona virus-ni a·sel lockdown ong·miting somoio, an·tangtangko on·kange songsalni manderangna dangdike on·gipa Doctor, Nurse, Police, Supply Department aro dingtang dingtang gittim aro nokdangrangona cha·ani ringanirangko aro salantio nanggipa bosturangko sokate on·gipa dingtang dingtang NGO-rangni dolrangkoba, uamangni ka·donge aro kim·kime dangdike on·anina mande ra·pilskaaniko dakanggen aro Corona Virus Covid-19 Fronline Warrior Award-rangkoba on·angjolgen.
Una agreba, ia programo git ring·susaani, chroksusaani, beauty contest-rangko ong·atenga. Indake dingtang dingtang a·bao nambate dakgiparangna jedake git ring·gipa, actor, actress, film video tarigipa, sports, HSSLC/SSLC topper, youtubers, news reporters, iandakgiparangnaba dingtangmancha award-rangko on·nanggen.
