TURA: South Garo Hills jolo walni somairango niamgri aro nanga badepile koelarangko salenga ine Federation for Khasi Jaintia Garo People (FKJGP) aro Garoland State Movement Committee (GSMC) Nongalbibra Circle Jadi Outpost-na badi ka·doangaha.
Uamangni badi ka·ani gitade, Jadi-Gasuapara unbaksa Dangsa Awe-Karongre NH-127 (gitcham NH-62) ramarang gita walni somairango niamgri aro nangana badepile walantian koela Truck garirang salruraenga aro iani a·selan re·ruraanio kenchakna nangani ong·enga ine NGO-rang aganaha.
Bang·bata truck garirangan chu·onga gita lekkarang dongtokja ine aganengon, bol 50 ba 60 mangni gita truck garirang walantian koela salenga aro uamangonin bang·batan maming nanggipa lekkarang dongja. Uamangni iandake niamgri aro nangana badepile koela salenganichi mijamangmang taridapgipa ramarang nosto ong·taipilaha ineba uamang aganaha.
Niamgri aro nangana badepile Jadi-oni Gasuapara-ona koelarangko salengani gimin taritaigipa NH-127-ni adita ramarang nosto ong·tokengaha, aro walo songre-songbatgiparangnaba namen kenchakani gnang ineba NGO-rang jajrengani kattarangko parakangaha.
Iandake jrimgipa garirangni re·ruraaniko nirokgijaniara Traffic aro Transport regulation-ni niamrangko pe·asan ong·aija indiba manderangna kenchakgnikoba ong·atenga aro rama-sorokrangko namen nosto ka·enga. Unigimin jinmani namgnina Jadi-Gasuapara aro NH-127 ramarang gita walni somaio trak garirangni bostu gate salanirangko nirokna nanga aro nangana batpile bosturangko gate salna on·na namgja ine dolgni NGO-rang didianiko on·aha.
Jadi-Gasuapara rama niamgri, nangana batpile koela gate salenga: NGO-rang
Date:
Share post:
