SHILLONG: A·dokni sak 23,000 baten adhoc aro SSA teacher-rangna gital dormahako on·na parakaniko Meghalaya SSA Schools Association (MSSASA), namnike ra·chaksoaha. Sukrobar salo cabinet, SSA teacher-rangna structured pay scales, annual increment aro job security ba kamo naljokaniko on·na ra·chakaniko parakaha.
MSSASA-ni president Aristotle C Rymbai, Cabinet-o SSA teacher-rang gital dormahako on·na ra·chakaniko kusi ong·bee ra·chaksoaniko parakatengon, “ian SSA teacher-ni batanggimin ru·uta bilsirangoni nikjumangako chu·sokataha. Bilsi 2016-onin SSA teacher-rang dormahani gimin dabiengachim. Uan da·osa chu·sokaha.
Iarangni gisepon Education Department-ni on·gipa proposal ba mol·molaniko cabinet-o ra·chakanina Chief Minister Conrad Sangma-ko mittelangaha. Cabinet-ni ja·ku de·aniara SSA teacher-rangna rang·speaniko ra·baaha ine Rymbai aganaha.
Meghalaya a·dokni sak 23,000 Adhoc aro SSA skigiparangni pay scale, annual increment aro uamangni kamko naljokatanina Education Department-ni de·e ra·bagimin ba proposal-ko a·dokni Cabinet-o ra·chakaha.
Adhoc aro SSA skigiparangna uamangni seniority ba kam ka·ani bilsi ru·utani kri dormaharangko bariatna gita Education Department-ni de·e ra·bagiminko Cabinet-o ra·chakaha, unbaksana uamangni kamrangko kim·kimatna aro uamangni kamoni neng·takani somoio tangka-paisani gita neng·nikaoni naljokna gita Contributory Provident Fund (CPF)-koba ra·gatgen, jenan skigiparang aro sorkari dolgnian on·gilgen. Bariatgimin dormaha-rangko 2026 bilsini April 1 tarik dipet on·anggen.
