SHILLONG: Gital tarigimin curriculum-ko Meghalaya Sorkarini ra·chakani ja·mano, mikkang changonide Meghalaya-ni school-rango a·bachenggipa class-rangode pilak bi·sarangan Khasi aro Garo minggni ku·sikrangkon skie ra·na gita nanggnok.
Gital tarigimin syllabus-o gita school-ni dingtang dingtang texbook-rang baksana a·bachenggipa class-rangoni uchi class I-onade a·dokni dakbewal-rikbewal aro itihas-rangni gimin skie on·anirang donggen.
Tom·e chanchirimaniko dakani ja·mano, aganengon, curriculum-ko gital dake taritaiani miksonganide uan, nangchongmotgipa skie ra·anirang baksa gimikni gitan bi·sarangko chonaonin tarina, a·doktangni daka-rikanirangni bidingo ma·siatbana gita ong·a ine Chief Minister Conrad K. Sangma aganaha.
Indake bi·sarang altuae ma·sina man·na gita Khasi aro Garo textbook-rangko syllabus-o napataha.
Re·baenggipa bilsina mitam school-rangode gital tarigimin syllabus-ko ja·rikna ra·gatengahaon, textbook-rangko bakande nangchongmotgipa dakatjachina sorkarioni aganskaenga.
Indake da·omitingo iako optional ba basena man·gipa subject dakatkugen indiba mikkangchide iako pilak school-rangon nangchongmotgipa dakatgnok ineba sorkarioni parakaha.
