SHILLONG: Re·baenggipa 2026 bilsio ong·atna sienggipa Garo Hills Autonomous District Council (GHADC) election-o susana gita Bharatiya Janata Party (BJP), candidate-rangko sandina a·bachengataha.
Iani bidingo kobor ra·timgiparangna u·iatengon, GHADC election-o BJP, man·a dipet bang·bata constituency-rangon susana miksongengani gimin candidate-rangko sandina a·bachengaha ine BJP-ni dilgipa aro Pynthorumkhrah MLA AL Hek parakataha.
“GHADC election-o chinga pilak constituency-rangon susana nangnikengani gimin candidate-rangko sandina a·bachengengaha. GHADC-ni chu·gimik constituency-rango susana man·jagenchimoba chinga komibeoba dam 60-70 constituency-rangode susana ka·dongenga,” ine Hek aganaha.
Hek-ni parakatani gitade, GHADC election-o BJP-ni tikitchi susana bang·a manderangan dorgastorangko galaha indiba da·o dipet candidate-rangko parakkujaenga.
“Bang·a manderangan BJP-ni tikitna dilgiparangko grongetokaha indiba da·o dipet chinga candidate-rangko parakkujaengani gimin bimingrangkoba aganna man·kujawa,” ine ua aganaha.
A·songni Prime Minister Narendra Modi-ni dingtang dingtang namroro silroroatani kamrangko nike aro Act East Policy-na bang·a manderangan BJP-ko namnikbattokenga ineba Hek aganaha.
“Meghalaya a·dokni pilak biaprangon manderang, BJP-ona re·batokenga maina uamang Prime Minister Narendra Modi-ni India a·songna aro Meghalaya a·dokna rakbee kam ka·aniko nikmanaha,” ine BJP MLA aganaha.
GHADC election-ni ja·man gipin dolrang baksa bakrimani bidingo janapatengon, election-o seat-rangko cheani kri, gipin political dolrang baksa, mongsongbate National People’s Party (NPP) baksa bakrimani cholrang donga ine Hek aganaha.
“A·dok sorkario jekai chinga MDA baksa bakrimenga, apsan daken gipin party-rang baksa bakrime kamko ka·na kusi ong·enga. District Council-oba chinga uamang baksa apsan kamrangko ka·rimna kusi ong·aigen. Indiba election-o chinga badita seat-rangko chegen aro NPP, badita seat-rangko chegen, unosa pangchakaigen,” ine Hek aganaha.
