Songsak-Mendi rama gita niam gri koela salruraengani a·sel neng·nikaniko man·enga

TURA: Songsak-Nangapa-Mendipathar rama gita niam gri koelarangko salruraengani a·sel ia ramani obosta namjabatroroengaha aro ia jolrango songdongenggipa manderangna kenchakna nangani ong·enga ine Williamnagar-ni Ukil saksa Joshua Ch Marak parakataha.
Marak-ni parakatani gitade, walantian ia rama gita koela salgipa truck garirang, nangana bate koelarangko gatenba re·ruraengani a·sel, ia nosto ong·gimin ramako namjabatroroatenga aro iani a·selan ia ramao pangchakna nangenggipa jolni manderangsa neng·nikanirangkode chagrongna nangtokenga.
“Ia ramani samba jolrango songdonggipa manderang, bilsi gimikan ia rama gita office-ni kamrangna, sagipa manderangko ra·rurana, skul-college-rangchi re·na aro dingtang dingtang nangchongmota kamrangna jakkaltokpaenga aro wachini somoirangode ia rama gita gari gorarang re·na namsrangjaenga. Ia ramani obosta namjaengon, da·o walantian ia rama gita koela salruragipa garirang re·ruraengani a·sel ia ramako namjabatatengaha aro ian jolo songdongenggipa manderangna neng·nikani aro kenchakna nanganiko ra·baenga,” ine Marak parakataha.
Marak-ni parakatani gitade, koelarangko Nongalbibra-oni Rongjeng aro Dainadubi gitasa Assam-ona metric ton 12 ka·e salna gita Meghalaya sorkarini Mineral Resources Directorate u·iataniko on·ahachim aro koelarangko 2025 bilsini August 8 tarikoni jasanasan salna gita on·aiahachim.
“Sorkarini ge·etanirangko on·ani ja·manoba koelarangko nangana bate gatenba weighbridge slip-rang grisa, Songsak-Nangapa aro Mendipathar rama gita salskaenga aro iako District Mining office-rang aro Nongalbibra, Rongjeng, Songsak, Dagal A·pal, Darenchi aro Mendipathar police station-rang nikengoba nikja dake dongtokenga,” ine Marak matnangataha.
Iandake niam gri koelarangko salengoba maming ja·kurangko de·jaengani gimin nangchakegipa pilak sorkari official-rangni kosako sandirokchina gitaba Williamnagar-ni ukil didiataha.
Meghalaya a·doko niam gri koela bikotaniko 2014 bilsi dipetan National Green Tribunal (NGT) champengatahaoba Garo Hills aro Khasi Hills-ni adita biaprango paraken, koelarangko bikotengkua ine janapatengon, re·anggipa December-ni 16 tariko, Bolroram Agalgre songni mande saksa, Shallang jolo niam gri koela bikotani a·sel, janggitangko gimaatna nangaha ine Marak parakataha.