SHILLONG: Da·o dipet Meghalaya a·doko HIV man·gipa manderang sak 10,000-mangni gita donga ine see rakkianio parakahaoba, bang·bata manderangan porikka ra·e nina aro sanna bananiko ra·na re·bana siktokjaengani gimin a·doko HIV man·e janggi tangenggiparang batkunaba gnang ine Meghalaya AIDS Control Society (MACS) jajrengchakenganiko parakataha.
Iako MACS-ni assistant director (IEC) Rapborlang Rani, Shillong Archdiocese Catholic Youth Movement (SACYM) Zone-I, Headquarters Mawkhar Parish aro MACS-ni nangrime, Mawlai-ni Madan Heh Football Ground-o Futsal Frenzy Tournament-ko ong·atanio jinmana parakataha.
“Da·o dipet a·doko sak 10,000-mangni gita HIV man·gipa manderangko segate, sanna bananirangko on·enga indiba bang·bata manderangan an·tangtangko porikka ra·e nina aro sanna bananirangko ra·na siktokjani gimin HIV man·e janggi tangenggiparang ianan batkunaba gnang ine chinga chanchichipenga,” ine Rani aganaha.
HIV/AIDS sabisiko chel·chakanio pilakkon bakrimchina gita didiatengon, ian sorkarini ba health department-mangmangni daitosan ong·ja ine MACS-ni assistant director parakataha.
HIV/AIDS-ni bidingo mikrakataniko on·anio aro porikka ra·e nichina didianio ma·a paarang, ja·delgimin manderang aro a·doko songdongenggipa pilakan bakrimna nanga ineba ua aganaha.
Rani-ni aganani gitade, HIV/AIDS-na porikka ra·e nianio positive ong·ahaon, somoi gita sanna bananiko ra·china, an·tangtangko simsakchina aro dakchakanirangko ra·na gita kratcha·jachina doctor-rang, nurse-rango agan-ku·pattie on·giparangba didirongenga.
HIV man·aiani giminde mandeara ‘namja’ ine ong·ja aro somoi gita sanna bananirang baksa simsak nirokanirangko ra·genchimode, HIV man·gipa manderangba ramram mande gitan janggi tangna man·aia ineba MACS-ni assistant director aganaha.
HIV man·aniko seng·gnangan ma·sie ra·na nangchongmota ine talataniko on·angengon, HIV man·anikode seng·gnang porikka ra·e nianichisa ma·sina man·a aro HIV man·on somoi gita sanna bananiko ra·na nangchongmota ine Rani aganaha.
“HIV man·aiahani giminde nang·ni janggi bon·aha indake ong·ja, porikka ra·anichi aro somoi gita sanna bananiko ra·anichi manderangni janggirangko jokatna man·a,” ine ua aganaha.
