SHILLONG: Voice of the People’s Party (VPP)-ni president aro Nongkrem MLA Ardent Miller Basaiawmoit-ko man·chape VPP-ni dilgiparangna ka·mikkenataniko on·anina VPP Nongkrem constituency, Hynniewtrep National Liberation Council (HNLC) bobil dolko jegalataha.
HNLC bobil dolni ka·mikkenataniko jegalatengon, manderangni seokgipa dilgiparangko ka·mikkenataniara, a·songni niam bidiko on·gimin bilrangko pe·ani aro chonnikani gita ong·a ine VPP Nongkrem constituency-ni secretary H Riang parakataha.
HNLC bobil dolni ka·mikkenataniara ra·chakna man·gijagipa kam ong·a ine janapatengon, VPP-ni dilgiparangko ka·mikkenatanio jak donggipa manderangni kosako rakgipa ja·kurangko de·china Riang didiataha.
Iandake HNLC bobil dolni ka·mikkenataniara party-ni membor-rangkosan ong·aigija a·doko songdongenggipa pilak manderangnan kenjagokataniko ra·baani gita ong·aha ine janapatengon, HNLC bobil dolni iandakgipa kamara, Khasi jatna aro a·dokni manderangna simsakgijaniko mesokanisa ong·aha ine VPP Nongkrem constituency-ni secretary parakataha.
“A·songni niamrango pangchakgiparang ong·e chinga chingni dilgiparangni naljokanina bi·enga. Chingni dilgiparang a·dokni manderangna aro Tribal manderangna maming kenchakani gri mikkangchiba dangdike on·angna man·angkuchina,” ine Riang parakataha.
Party (VPP)-ni president Ardent Miller Basaiawmoit parakatskaaha.
Khasi Hills Autonomous District Council (KHADC)-ni kamrango jak on·jachina didiatani ja·man, an·tangko ‘Blei Khyndew’ ba ‘A·gilsakni Isol’ dake mesokjachina VPP-ni president Ardent Miller Basaiawmoit-ko HNLC bobil dol mikrakatskaahachim.
“Hima Sohra-ni acting Syiem ong·e kam ka·enggipa Mynjurlang Majaw-ara, VPP-na kam ka·gipa mandean ong·a ine chinga namen ma·sia, uni gimin Hima Sohra-ni Syiem-ko songanio KHADC-ni chu·sokgijanina chinga ku·rang on·aigen. Ardent Basaiawmoit an·tangko nama ine chanchijachina aro ‘Blei Khyndew’ ba ‘a·gilsakni Isol’ gita an·tangko mesokjachina,” ine HNLC-ni general secretary Sainkupar Nongtraw, mikrakataniko on·angahachim.
KHADC-ni kamrango jak on·jachina Basaiawmoit-ni agangipa kattarangna aganchakaniko on·atengon, “Tribal jatrangni bilrango nangchakegipa je kamoba HNLC, jak on·pana bil dongaia,” ine Nongtraw parakataha.
HNLC bobil dolni iandake mikrakatanina aganchakaniko on·angskaengon, manderangni nangnike seokanichisa KHADC-ko VPP chalaienga aro badiaba bobil dolni a·sel ong·ja ine Basaiawmoit parakatskaaha.
