India-ni kombolrangko B’desh-ona niam gri ra·angenga ine ACHIK badi ka·a

TURA: India a·songni kombolrangko Garo Hills gita niam gri Bangladesh a·songona badingsrukatenga ine A·chik Conscious Holistically Integrated Krima (ACHIK) dol parakatenba, iani bidingo nanga gita sandirokanirangko dakchina West Garo Hills a·jani Police-rangko didiataha.
Iani bidingo ACHIK dol, Tura Police Station-ni officer-in-charge (OC)-na seachi badi ka·doangaha.
Tura Police Station-ni OC-na sedoatgipa chittio ACHIK dolni parakatani gitade, India a·songni kombolrangko Garo Hills gita Bangladesh a·songona ra·angenga ine batanggimin antirangonin changni chang u·iatanirangko man·soani ja·man December-ni 27 tarik walo ACHIK dolni dilgiparang, AS-01TC 9745 truck gari bolsako Araimile jol gita re·pakangengako nikenba, truck gariko neng·takate, gari driver-ko sing·sandion, ia gario kombolrangko gate, South Garo Hills a·jani Mahadeo songona salangenga ine aganchakaha.
“Indita king kombolrangko South Garo Hills a·jani diltubegipa songona ra·angengani gimin talbate sing·sandion, ia kombolrangko Bangladesh a·songona palsrukatna ra·angenga ine garini driver aganchakaha. Uni ja·man, dingtang dingtang department aro dolrangni niam gri tangka gilaniko chipe ra·gipa mobile phone-koba ua chingna mesokaha. Uni gimin ia mobile phone-koba sandirokanio jakkalna gita nangchongmotenga,” ine ACHIK dolni dilgiparang parakataha.
Ia gario kombolrangko salna jakkalgipa invoice-rang, E-way bill-rang, GST lekkarang aro gipin nangchongmotgipa lekkarangko name nipiltaichina didiatengon, “Da·o gita Bangladesh a·songni India a·songni kosako chakatna jotton ka·engmiting somoio, India a·songni ma·manti bosturangko Bangladesh a·songona badingsrukataniara, India sorkarina kajina man·anio gimaanisan ong·jaenga indiba niam gri kamrangko ka·anichi Bangladesh a·songni economy-ko mangrakbatate, India a·songnan kenchakna nanganiko ra·baani gita ong·enga,” ine ACHIK dolni dilgiparang, mikrakataniko on·angaha.