Reservation Policy-ko name tarina man·na gita sorkarina somoi on·china UDP didia

SHILLONG: Meghalaya a·dokni State Reservation Policy (SRP)-ko nangani kri nambate tarina man·na gita Expert Committee-ni on·gipa report-ko name nipilna chu·onga gita somoiko a·dok sorkarina on·china, National People’s Party (NPP)-chi dilenggipa Meghalaya Democratic Alliance (MDA) sorkario bak ong·enggipa United Democratic Party (UDP) didiataha.
UDP-ni general secretary Titosstarwell Chyne-ni aganani gitade, Expert Committee-ni on·gipa report-ara, king 4000-oni 5000-mangni gita lekkarang dongani gimin, ia report-ko jinmana parakna skangba name nipiltaianio bewalan somoirangko nangkugen.
“King 4000-oni 5000-mang ong·pilgipa report-ko taridapna aro bon·kame manderangna mesokna gitade somoiko nangaigen. Uni gimin a·dokni reservation policy-ko name matchote tarina gita sorkarina somoiko on·na nangaigen,” ine Chyne aganaha.
Iani bidingo Chief Minister, an·tangan talataniko on·manahani gimin sorkarini miksonganirangko darangba ong·gija dake chanchichipna nangjawa ineba UDP-ni dilgipa aganaha.
“Report-ko tarimane da·o sorkari, name nipiltaianirangko dakna nangkuengani gimin ong·gija dake chanchichipanide kraani ong·jawa,” ine Chyne aganaha.
“Ia report namen bakrobea aro da·o taridapna nanganirangko taridapengkua ine Chief Minister an·tangan talataniko on·ahani gimin chinga kusi ong·a,” ine ua aganaha.
Reservation policy-ni report-na manderang indinan sengahani gimin da·o ia report-ko taridape on·na gita sorkarina somoiko on·anioba manderang maming neng·nikanirang dongna nangjawa ineba UDP-ni general secretary parakataha.
State Reservation Policy-ni bidingo Expert Committee-ni on·gipa report-ko bakan manderangna parakatgnok ine adita salrangna skangsan a·dokni Chief Minister Conrad K Sangma parakatenba, ia report namen bakroani a·selsa aro ia kamara namen simsakna nanggipa ong·ani giminsa somoiko ra·kuna nangenga ine talataniko on·angahachim.
Ia report-ko jinmana parakjagenchimode, jingjengatanirangko dakanggen ine Voice of the People’s Party (VPP)-ni president aro Nongkrem MLA Ardent M Basaiawmoit aganahani gimin a·dokni Chief Minister, ia talataniko on·angahachim.