SRP-ni bidingo Expert Committee-ni report-ko ta·rake parakchina KSU dabia

SHILLONG: State Reservation Policy (SRP)-ni bidingo Expert Committee-ni tarie on·gipa report-ara namen bakroa aro kg 200-mang ong·pilani a·sel ia report-ko nipilanio somoi nangkuenga ine Chief Minister Conrad K Sangma-ni a·kanganiko Khasi Students Union (KSU) sing·doatenba, ia report-ko ta·raken jinmana parakchina dabiangaha.
Iani bidingo kobor ra·timgipa manderang baksa agangrikengon, reservation policy-ni bidingo Chief Minister-ni iandake agananiara ma·sisokgijani ong·a ine KSU-ni president Lambokstarwell Marngar parakataha.
“Ian Indian Constitution-sa ong·genchimode haida uni aganako ma·sinaba gnangchim indiba ia policy report-ni jreani kg 200 ong·a ine agananikode ma·sisokjaha. Iako a·dokni Chief Minister an·tangan talate on·na man·naba gnang,” ine Marngar aganaha.
Expert committee-ni report-ko jinmana parakningjaengani gimin sorkariko sing·doatengon, ia report-ko maini gimin da·onan nipiltaina nangkuenga darangba ma·sitokjaenga ine KSU president aganaha.
“Ia report-ni jreani baita ong·a angade ma·sija aro ia report-ko poraina gita badita bilsirangko nanggen, iakoba angade ma·sija,” ine Marngar aganaha.
Sorkarini iandake talataniko rongtalbreja ine janapatengon, “Ia report-ko sorkari, kilo hisaposa mesokna aro tona man·a ong·ode chinga iako bebera·na nangaigen. Indiba da·o mamingkon talbrekujaenga,” ine KSU president aganaha.
Report-ko dongnuna jotton ka·jachina sorkariko didiatengon, manderang pilakan an·tangtangni agan-ku·pattianirangko on·manahani gimin SRP-ni report-ko sorkari, ta·raken manderangna mesokna nanga ine Marngar aganaha.
“Manderang chu·ongnikaniko man·na gitasa sorkari niamko tarina nanga. Expert Committee-ni ku·pattianirangko ra·chakani ba jegalani kamde manderangni jakosa,” ine ua aganaha.
KSU president-ni aganani gitade, niam tariani report-rangara indita bakrogipa ong·naba nangjachim.
“Iade policy-ko tariani kamsa, Indian Constitution-ba ong·ja. A·dokni job reservation policy-ko sorkari namdapatna gisik nangbebegenchimode ia report-ko kan·dikeba tarina man·aiachim,” ine Marngar aganaha.
Iani bidingo KSU, gipin dolrang aro political party-rang baksa chanchirime, nanga gita ja·kurangko de·anggen ineba Marngar parakataha.
“Ia kamde KSU-mangmangni daito ong·ja, uni gimin ia report-ko parakchina gita maikai sorkariko didina nanga, chinga gipin dolrang baksa chanchianggen,” ine ua aganaha.