Rel garirangko jegalanichi M’laya a·dokna bang·en gimaani ong·naba gnang: BJP

SHILLONG: Gipin biaprangoni re·baenggipa manderangko name nirokna gitade rel gari garirango songregiparangko nirokanian ong·a aro a·doko rel garirangko jegalenganichi bang·en gimaaniko ra·baani cholrang donga ine Budbar salo, Bharatiya Janata Party (BJP) Meghalaya unit-na ku·wattimgipa Mariahom Kharkrang parakataha.
A·doko rel garirangko ra·bagija donchipanichi bang·en noksan ong·ani cholrang donga ineba ua aganaha.
“An·chingni a·dokona rel garirangko ra·bana on·jagenchimode an·ching an·tangtangan noksan ong·nasienggiparang ong·a. Bilsi 30 ba 40-ni ja·mansa an·chingni dedrang su·drangrang, maini gimin rel garirangko a·dokona ra·baja ine sing·donaba gnang,” ine Kharkrang aganenba, rel garirangko ra·baanichi a·doko bading chiwalani aro pilakni gitan namroro silroroanikoba ra·bana man·gen ine parakataha.
Guwahati songjinma baksa tosusae Meghalaya a·doko dingtang dingtang bosturangni dam rakbataniara, rama gita re·baenggipa garirango pangchakani a·selan ong·enga ineba BJP-ni dilgipa talataniko on·angaha.
“A·gilsakni pilak biaprangon an·chingni ramram rama gita songre songgabatanian dam rakbatsranggipa ong·a. Ian an·chingni bazaar antirango bosturangnaba nangchakeaniko ra·baa aro manderangna bal-bojako ra·baa,” ine Kharkrang aganaha.
Rel garirangko ra·baanichi niam gri napsrukbagiparang batrorogen ine dingtang dingtang dolrangni kenchaktokenggipani bidingo janapatengon, rel garirangon gipin biaprangoni re·baenggipa manderangkode nambate nirokna man·a ine Kharkrang parakataha.
“Rel garirangkode tik ka·gimin station-rang gitasa wata aro ia railway station-rangode rakgipa niamrangko dona. Ramarang gitade je somoioba manderang re·na dona man·aiani gimin an·ching name nirokna man·ja,” ine BJP-na ku·wattimgipa talataniko on·angaha.
Inner Line Permit (ILP)-ko ra·gatchina dabienggipani bidingo janapatskaengon, salgro salaramni gipin biaprango ILP-ko ra·gatanichi choliama cholijaenga, ukoba name am·sandichengna nanggen ine Kharkrang aganaha.
Meghalaya a·dokara dingtang dingtang a·dokrangona nappak dopagipa biapsa ong·ani gimin ILP-ko ra·gatanichi neng·nikanirangko man·naba gnang ineba ua aganaha.