ISIS-K ine a·kanggipa dolni kosako bichal ka·china Bernard, DGP-ko didia

SHILLONG: Garo Hills-o, ISIS-K bobil dolni bimingo Turao poster kingsako tapenba A·chikrangko ka·mikkenatgipani bidingo BJP dilgipa aro Tura MDC, A·dokni DGP-na sedoataha. DGP-na uni seatgipa chittio janapata je, je poster-on A·chikrangko 2027 bilsini gisepo A·chik a·songko wate katchina gita ka·mikkenatahachim, uko tol·gipaine ra·na man·jawa, maina uamangna ning·joljol kam ka·giparang dongainaba donga. Prevention of Atrocities (SC/ST) Act-o pangchake Sofior Rehman-ni kosako FIR ka·aha, je a·selrangko sandina a·bachengaha. Adita social mediarangoba Garo Hills-ko an·tangtangni a·ja ine a·kange A·chikrangko ka·mikkenatanirangkoba nikenga, ine chittio janapataha.
Sixth Schedule area-rangon Assam Schedule-ni ning·o pattarangko tarie donggiparangba Garo Hills-o donga. Uamang Governor-ni ra·chakani gri ba niam gita ong·gija songdongenga. Khasi aro Jaintia Hills-o gita ong·gija, Garo Hills-o minggni a·selrangni gimin bal-boja ong·enga. Sixth Scheduled-ara dingtangmancha Tribal rights ba bilko chel·chakna gita on·giminsa ong·achim, indiba uano pattarangko General Schedule (Assam Schedule)-ni ning·o on·enga ine Marak, A·dokni DGP-na seatgipa chittio janapataha.
Re·anggipa somoioba Rajabala Police Station-ni ning·o ACHIK dolni saksako chadrape so·otaha, sawarang maina so·otahachim uani a·slerangkoba talkujaenga. Unigimin iandakgipa a·sel obostarangko Special Investigation Team (SIT)-chin namedake sandiatna nanga, haida uamang ISIS–K ba a·jolo bobil dake chakatgipa dol baksa jak dongengnaba donga, jemangan jat basee nanggrikatna miksonge dakenga ineba janapataha.
Indake ong·engon, ia a·selko bil gnanggipa aino segatna nanga, a·selko sandina gita Special Investigation Team (SIT)-ko songna nanga, dosi dakgipako rim·enba bakan bichal ka·na nanga ineba BJP dilgipa, a·dokni DGP-ko didiataha.
Ia indakgipa denggu dakgiparangko maming dakeba watna nangja, maina ian a·songni naljokgnina kenchakani donga ine aganenba sandianio dakchakpana gitaba Marak aganaha.