TURA: Wa·dagokgre (Bhaitbari-o) skang chasongoni ASI-ni ripingbaenggipa km 15 mang apalgipa biapo skatang ro·ong bikotaniko aro gipin niam gri kam ka·aniko West Garo Hills a·jani Deputy Commissioner, Vibhor Aggarwal champengataha.
Indake Archaelogical Survey o India (ASI) ni ripinge donenggipa biaponiko niam gri samtangtango donggipa gamrangko nisigalaniko dontongchina aro ro·ongrangko nosto ka·jachina gita DC, re·anggipa January, 27, 2026 tariko ge·etaniko on·aha.
Ia ripinge donenggipa ro·ongrang, Assam Ancient Monuments and Records Act, 1959-o Meghalaya a·dokni ra·chake donenggipa biapba ong·a, je biapon adita bilsirangonin napsrukbagiparang niam gri dongenga aro ASI-ni ripinge donenggipa biap sambajolo dal·dalbegipa kolrangchi a·arangko nosto ong·atenganiko nikna man·a, jeni a·selan chengoni ripinge dongipa ro·ong aro a·ani bakrang nosto ong·atako man·e bang·bata a·briarigipa biaprang porongrong ong·atako man·aha.
Indake ASI ni ripinge donenggipa biapo skatang songdong-a·chae ripinge donenggipa ro·ongrangko nosto ong·atana agrea ua jolo skatang ro·ong bikotanichi aro a·arangko nosto ong·atanichi adita salrangna skangsan ACHIK NGO dol ko gipin jatrangni chadrapanikoba nikangna man·angaha jeon gipin jatrangni chadrapanichi saksa mande janggi tangko gimaatna nangahachim. Indake ong·engon ASI ni ripinge donenggipa biapo niamgri songdong-a·chaaniko champengan baksana niamgri samtangtango donggipa gamrangko nisigalna man·jana gita West Garo Hills a·jani Deputy Commissioner, Section 163 Bharatiya Nagarik Suraksha Sanhita (BNSS) ko ra·gate District Administration champengataniko ja·rikchina ge·etaniko dakangaha. Unbaksana ia u·iatani ko on·angengon ian Meghalaya Land Transfer Act, 1971 aro District Council ni dongimin niam ko ja·rikjani a·sel champenggimin biapo songdongengon orto grigipa ong·ata ine u·idapataha.
