TURA: Meghalaya Board of School Education (MBOSE)-ni Secondary School Leaving Certificate (SSLC) porikkako mijal Sukrobar sal dipet a·dokni pilak centre-rangon a·bachengataha.
Ia bilsini SSLC porikkako a·dok gimikoni sak 63,600-na baten chatro chatrirang, a·dokni dingtang dingtang centre-rango setokenga.
SSLC porikkako January 30 tarikoni a·bachengate, February 11 tariko matchotatgen.
Skanggipa salo, English subject-ko chatro chatrirang seaha, uni ja·man February-ni 2 tariko Science subject-ko seangskagen. February-ni 4 tariko Health & Physical Education/Computer Science/Vocational Subject-rangko sena donsoaha aro uni ja·man February-ni 6 tariko Social Science, February-ni 9 tariko Mathematics/Special Mathematics aro bon·kame February-ni 11 tariko Indian Languages/Additional English subject-ko seangskagen.
Ia chang SSLC porikkako re·anggipa December jaon ong·atna tik ka·ahachim indiba porikkako segipa chatro chatrirang, skigiparang, MBOSE-o kam ka·giparang aro dingtang dingtang dolrangba jegaltokahani gimin January jani bon·kamgipa antiona sorkari ra·doatskaaha.
SSLC porikkao chu·sokna man·pagijagipa candidate-rangba apsan bilsion supplementary porikkako sepiltaie pass ka·na man·na gita ia porikkako a·dok sorkari seng·gnangkale ong·atskaaha.
