ANVC baksa songgigrikaniko chu·sokatchina Tura MDC gisik ra·attaia

TURA: 2014 bilsio A·chik National Volunteers Council (ANVC) aro ANVC-B dolrang baksa a·dok aro ma·mong sorkarirangni songgigrikaniko aro 2025 bilsini September jao State Level Monitoring Committee-ni tom·anio tik ka·aniko Tura-ni MDC Bernard N Marak, a·dok sorkarina gisik ra·atpiltaianiko on·angaha.
Iani bidingo Meghalaya sorkarini Home Minister Prestone Tynsong-na sedoatengon, 2025 bilsini September 25 tariko, State Level Monitoring Committee-ni tom·aniko ong·atanio, jagniprakon tom·aniko ong·atna, nodal officer-rangko songna, sorkarini on·gipa rehabilitation package-rangko man·kugijagipa ANVC aro ANVC-B dolni manderangna dakchakanirangko on·na aro district committee-rangko songna tik ka·ahachim indiba ia ku·rachakanirangko da·alonan sorkari, chu·sokate on·kujaenga ine Marak parakataha.
“Changni chang ku·rachakanirangko on·ani ja·manba ANVC dolrang baksa songgigrikaniko chu·sokatchipgijaniara a·dok sorkarini gisik nanggijaniko mesokani ong·enga. Garorangni dingtang dingtang neng·nikanirangko namatchipgija donaniara Garo Hills aro Garo Hills-o songdongenggipa manderangni neng·nikanirangko namatna a·dok sorkarini gisik nanggijaniko mesokani ong·enga,” ine Marak, a·dokni Home Minister-na sedoatgipa chittio parakataha.
ISIS-K bobil dolni A·chikrangna ka·mikkenataniko nom·e ra·na man·jawa ine janapatskaengon, Garo Hills-o niam gri quarry-rangko chalaina on·ani a·selan gipin biaprangoni manderang napsrukbae ong·gija kamrangko ka·aha aro adita salrangna skang, Rajabala police station-ni ning·o A·chik chadambe saksa sina nangaha ine Tura MDC janapatenba, ia a·sel ong·ani somoio silchidare goanirangkoba knaahachim indiba ia obostako dongnuna jotton ka·aha aro ian Garo Hills-ni a·kawe jolrango silchidare ra·bitgipa manderangni jak donganiko mesokani ong·a ine parakataha.
Ia a·selni bidingo name sandirokgenchimode A·chikrangko ka·mikkenatanio ISIS-K dolni jak donganiko ma·sinaba gnangchim ine janapatengon, a·dok sorkarini sandirokna gisik nangjahani a·selan gipin biaprangoni manderang, Garo Hills-ona re·napbae, niam gri quarry-rangko chalaina man·aha aro maming licence gri dingtang dingtang bading chiwalanirangko dake cha·na man·aha ine Marak parakataha.
A·kawe jolrango Tribal ong·gijagipa manderangna GHADC-ni a·a pattarangko niam gri on·ani a·selan ia jolrango songdongenggipa gipin jatrang, ia biaprangko an·tangtangni a·arang ine ma·sisrettokengaha ine janapatskaengon, “East Pakistan (Bangladesh)-ko bak dakani somoio katbranggipa manderang, Garo Hills-o songdongchengaha indiba ia biaprangara Sixth Schedule-ni ning·osa ong·ani gimin a·arangko breani ba ra·ani niamrang dongjachim. Indake ong·genchimoba, maming u·iatchengani gri bilsi 70-mangna skang Congress sorkari, Assam Land Regulation Act-ko ra·gataha aro katnape dongenggipa manderangna a·songni niam bidikko pe·e GHADC gita a·a pattarangko on·aha. Sixth Schedule a·jao iandake niam gri dakaniko simsakjani a·sel Assam schedule-ni ning·o donggipa a·arangko Assam-ona man·angpilgnok,” ine Tura-ni MDC aro ANVC-B-ni gitcham chairman Bernard Marak, jean 2014 bilsio a·dok aro ma·mong sorkarirang baksa songgigrikanio soi ka·giparangoni saksa ong·achim parakataha.
2025 bilsini September jao State Level Monitoring Committee-ni tik ka·gimin gita, ta·raken state level review meeting-ko ong·atchina, Nodal officer-rangko songchina, Tribal manderangko chel·chakna Sixth Schedule-ni ning·o dongimin niamrangko raken ja·rikchina aro District Level Committee membor-rangko ra·chakchina Marak didiataha.