TURA: North Garo Hills a·jani Wa·geasi songo donggipa National Highway-217 (gitcham NH-62) ramao niam gri weighbridge-ko chalaienga ine Kharkutta-ni gitcham MDC Smith M Momin, a·dokni Home Minister-na badi ka·doataha.
Momin-ni badi ka·doatani gitade, ia weighbridge-ko Garo Hills Autonomous District Council (GHADC)-ni bimingo chalaienga aro ia biapo GHADC-ni mandean dongtimengoba, garirangoniko gile man·enggipa tangkarangde GHADC-ona sokangjaenga.
“Ia weighbridge-o gile man·enggipa tangkarangko badiaba manderangsa ra·enga aro kobor man·soani gitade, ia tangkarangko GHADC-de man·sojaenga. Uni gimin ian bilko jakkalsretani gita ong·engani gimin jakgitele sandirokaniko dakna nangenggipa kam ong·a,” ine Momin, Home Minister-na badi ka·e sedoatgipa chittio parakataha.
Ia weighbridge-o jakkalenggipa toani ostro kam ka·jaenga indiba ia weighbridge-o truck aro bostu salgipa gipin garirangko ramao dongdipate, tangkarangko gile ra·enga ineba gitcham MDC matnangataha.
“Gario bosturangni jreaniko tochenggija, bostu salgipa manderang, tangkarangko gamna nangenga. Ian bostu salruragipa garirangna namen neng·nikani ong·enga maina ian NH ramao, niam gri tangka gile ra·anisa ong·enga,” ine Momin parakataha.
Ia weighbridge-ko niam gri chalaianiara, National Highways Act 1956 aro Motor Vehicles Act 1988-ni Section 114-ko pe·ani ong·enga aro ian Guwahati High Court aro Supreme Court-ni on·gimin ge·etaniko manija gita ong·enga ineba Momin parakataha.
Indake ong·engon, ia weighbridge-ko ta·raken chipatchina aro ia weighbridge-ko chalaiani bidingo jakgitele sandirokna gita ge·etaniko on·chinaba Momin, a·dokni Home Minister-ko didiataha.
Ia weighbridge-o gile man·gipa tangkarangni bidingo audit-ko ka·china aro ia weighbridge-ko niam gri chalaianio jak donggipa pilak manderangni kosako rakgipa ja·kurangko de·china gitaba Kharkutta-ni gitcham MDC, a·dokni Home Minister-ko didiataha.
Wa·geasi ramao niam gri weighbridge-ko chalaienga ine gitcham MDC badi ka·a
Date:
Share post:
