TURA: Adita salrangna skang, Rajabala jolo donggipa Goalgaon songo, mande saksako so·otani ja·man so·sojengjeng ong·anirang namsrangkujaengani gimin Robibar salo, Tura songjinmao donggipa dingtang dingtang mondolini dilgiparang, Tura Based Church Leaders Forum (TBCLF)-ni ning·o, a·selni bidingo sandina, bi·chakna aro duko ga·akenggipa nokdangko grongna gita West Garo Hills a·jani a·kawe jolrangona wenangaha.
Mondolini dilgiparangko Meghalaya Police-ni sak 12 police-rang, re·dilangaha aro ia jolrangona wenanganio mondolini dilgiparang, chong·mot a·selrangko ma·sie ra·na, manderangni nanganirangko knatime ra·an baksana dingtang dingtang biaprango bi·chakanirangkoba dakangaha.
Ia jolrangona wenanganio, dingtang dingtang mondoli aro ma·malrangoni gimik sak 20 membor-rang bak ra·angaha aro ia jolrangona re·angna skang TBCLF, dingtangmancha West Garo Hills a·jani Deputy Commissioner aro Superintendent of Police (SP)-naba u·iatchengaha.
Mondolini dilgiparang, Rajabala aro Shyamnagar-ona re·ange, jolo songdongenggipa manderangko grongna aro apsan chanchirimna cholko man·aha indiba Singimari aro Chibinang jolrangode obostarang namjabatengani gimin uamang re·angna man·jaha.
Ia biaprango Mondolini dilgiparang, jolo songdongenggipa manderangko gronge chanchirimengon, ia jolrango Sixth Schedule-ko GHADC gita bilaken ja·rikna nangengani gimin, Nokmarangni bil aro niamrangko rakkianio bakrimna nangengani gimin, kenchakna nangbatgipa biaprango police station, outpost-rangko donanichi manderangna chel·chakanirangko on·na nangengani gimin, niam gri re·napbae songdong a·chaenggipa manderangko niamo pangchake ra·galna nangengani gimin aro uandakgipa kamrangni bidingo chanchirimangaha.
