TURA: Ia 2026 bilsini Union Budget-o jatko chalaienggipa Rural Local Bodies (RLB) ba songadam nokadamni bimangrang aro Urban Local Bodies (ULB) ba jillarangko chalaienggipa bimangrang bilrangko man·na siengani gimin ian manderangni namgnina miksonge tarigipa budget ong·a ine BJP-ni state vice president aro Union Budget BJP State Team-ni convenor Bernard N Marak a·kangataha.
Jatko chalaienggipa bimangrang, Union Budget 2026-ni ning·o manderangna ku·chakgimin namgnirangko man·na gita an·tangtangan daitorangko ra·na nanga ineba Marak parakataha.
“Batanggimin bilsi 12-ni gisepo, damrang komie tang·doanichi aro mangrakbegipa namroro silroroaniko ra·baanichi Viksit Bharat-na pangchakaniko songaha. Ia kamrangan a·songo nokdang ge·antina, jatantina aro jolantinan dingtang dingtang namgni aro cholrangko ra·bagen. Prime Minister Narendra Modi-ni dilanichi India sorkari, kangal cholgrirangna, Sabka Saath, Sabka Vikas-ni miksonganio dakchakanirangko on·angkuna ku·mikchetenga,” ine Marak parakataha.
Marak-ni parakatani gitade, ia bilsini budget-o tangka paisani gita dal·roroani, an·seng baljokaniko on·anio tang·doani, lekka poranio namdapatani, kal·susaanirangko namdapatna dingtang dingtang chol, Tourism aro gama ge·anirangoba tang·doatna niksamsoanirang donga.
