SHILLONG: A·dokni dingtang dingtang biaprango galchipgimin koela a·damrang bang·en dongani gimin ia koela a·damrangko chipatanio sorkari neng·nikanirangko man·enga aro koela a·damrangko chipna baditaba bilsirangko nanggen ine a·dokni Chief Minister Conrad K Sangma parakataha.
Chief Minister-ni kobor ra·timgiparangna parakatani gitade, a·dokni dingtang dingtang biaprango, dam 22,000-mangni gita galchipgimin koela a·damrang donga aro ia koela a·damrangko nirok sandianio district administration-rang neng·nikanirangko man·enga.
Bristibar salo, East Jaintia Hills a·jani Thangsko jolo donggipa koela a·dam gopretanio komibeoba sak 20 manderang siangna nangahani gimin sing·anina a·dokni Chief Minister, ia kattarangko aganaha.
“Dam 22,000 galchipgimin koela a·damrangko nirokani aro chipataniara darang sorkarinan neng·begipa kam ong·gen. A·ja damsaon indita koela a·damrang dongani gimin haida ia koela a·damrangko chipatanio baditaba bilsirangko nangnaba gnang,” ine Sangma aganaha.
Niam gri koela bikotanio koela a·dam gopretanichi bang·a manderangan sina nangahani gimin aro bang·a manderangan saknaanirangkoba man·na nangahani gimin ua ia kamo jak donggipa manderangni kosako rakgipa ja·kurangko de·na gitaba ku·rachakaniko on·angaha.
“Je manderangan ia kamo jak donga, chinga uamangni kosako rakgipa ja·kurangko de·gen,” ine Sangma aganaha.
A·doko scientific mining-ko a·bachengatna sorkari jotton ka·engon, a·dokni dingtang dingtang biaprango niam gri koelarangko bikotengkua ineba Chief Minister ku·rachakaha.
“Je biaprangon niam gri koelarangko bikotenga, uandakgipa biaprango a·sel ong·anirangko nikna man·enga aro ian namen rasong gribeani ong·a. Je a·selan East Jaintia Hills a·jao ong·aha, ia a·selrang ong·na nangjachim,” ine Chief Minister aganaha.
