Niam gri koela bikotanio jak donggipa manderangko rim·china kachari ge·eta
SHILLONG: Bristibar pringo, East Jaintia Hills a·jani Thangsko jolo donggipa koela a·dam gopretanichi komibeoba sak 20 manderang siangani ja·man police-rang, ia koela a·damni nokgipa sakgniko rim·aha.
Iani bidingo kobor ra·timgiparangna u·iatengon, Thangsko jolo donggipa koela a·damo gopretanina police-rang, mande sakgniko rim·aha ine East Jaintia Hills a·jani Superintendent of Police (SP) Vikash Kumar parakataha.
Rim·a man·gipa mande sakgnini bimingrangko parakna jechakatengon, ia manderangko kachario mikkangpaatani ja·mansa uamangni biming aro biaprangko jinmana parakgen ine SP aganaha.
Koborko on·ani gitade, ia koela a·damo gopretanichi komibeoba sak 20 manderang sina nangaha aro saksku manderang saknaanirangko man·na nangahachim.
Kacharirangoni changni chang, niam gri koela bikotaniko champengchina ge·etaniko on·ani ja·manoba iandake koela a·kolo a·sel ong·aniara, a·doko niam gri koela bikotengkuaniko mesoktaiani ong·aha.
Re·anggipa January-ni 14 tariko apsan daken koela a·damo a·sel ong·anichi adita sak manderang sina nangani ja·man, Justice HS Thangkhiew aro Justice W Diengdoh-ni division bench, niam gri koela bikotaniko champengchina ge·etaniko on·angahachim.
Koela a·damrango niam gri koela bikotanichi manderang sina nangengani gimin niam gri koela bikotenggipa biaprangko sandienba, koela a·dam nokgiparangko aro niam gri koela bikotanio jak donggipa pilak manderangkon rim·china gita kachari, East Jaintia Hills a·jani Deputy Commissioner aro SP-na ge·etaniko on·angaha.
Koela a·damrango niam gri koela bikotna jakkalenggipa pilak ostrorangko aro lekkarangko rim·china ge·etaniko on·angengon, a·sel ong·anio nangchakea man·gipa nokdangrangna aro saknaa man·gipa manderangna pilak nanga dakchakanirangko on·china kachari ge·etangaha.
Iani bidingo East Jaintia Hills a·jani Deputy Commissioner aro SP-ko re·baenggipa February 9 tariko kachario mikkangpaechina gitaba ge·etaniko on·ataha.
