WGH-o niamgri matchu badingsrukani gimin badi ka·a

TURA: Tura Dakopgre-ni Hamrash N. Marak, P.O Holaidanga-ni ning·o ga·akgipa Buririjhar songoni Mojmul minggipa mandeni kosako West Garo Hills district-ni Bhogularbitha (Nidanpur) POP-o FIR-ko segatchina badi ka·aha.
Badi ka·dogipani matnangani gita, dos dakgipa batanggimin ru·uta somoirangonin niamgri maming lekka pangchakani gri matchu badingsruke, Prevention of Cruelty to Animals Act, 1960-ni niamko pe·aha.
Niamgri matchu badinganiko dontongchina dos dakgipako changni chang ku·sikchi agane mikrakatahachim indiba ua knachakgija kamko ka·angkuaha. Indake mnisal Sukrobar walni 7 ata bajio dos dakgipani niamgri maming lekka pangchakani gri mang 9 matchurangko badingako rim·a man·aha. Badingsrukatgipa  matchurang baksa dos dakgipako rim·e police-na pakwataha.
Iarangni gisepon dos dakgipa, GHADC-ni ge·etanio vide office order No. 159. dated February 5, 2026, bearing Memo No. GHADC-MD/TCM/258/22/2198-2208-ni gita tax ba kajinako gamna nangao ga·akachim indiba gamjaha unbaksana cattle tax ba kajinako gamna jechakaha ine badi ka·gipa aganaha.
Niamrangko pe·ani gimin dos dakgipani kosako FIR segate niamo pangchake uni kosako ja·ku de·china badi ka·dogipa mol·molaha.
Police, ia mamlako am·sandina a·bachengataha aro niamo pangchake ja·ku de·angna ka·dongataha.