SHILLONG: A·dokni Chief Minister Conrad K Sangma-ko kam watchina Opposition Voice of the People’s Party (VPP)-ni dabiangani ja·man Meghalaya Pradesh Congress Committee (MPCC)-ba dabiangaha.
East Jaintia Hills a·jani Thangsko jolo donggipa Mynsyngat songo koela a·kol gopretanichi bang·a manderangan sina nangahani gimin ia a·selna Chief Minister an·tangan daiko ra·na nanga ine Conrad Sangma-ko kam watchina MPCC dabiangaha.
Ia a·sel ong·anio bang·a manderangan sina nangaha aro bang·a manderangan saknaanirangko man·na nangaha ine janapatengon, a·dokni Chief Minister Conrad K Sangma, jean Mining & Geology department-koba jako ra·e chalaienga, kamtangko watna nanga ine MPCC-ni general secretary Sanjay Das dabiangaha.
“Ia a·selni bidingo Chief Minister an·tangan daiko ra·e, kamtangko watna nanga aro ia a·selni bidingo jakgitele sandirokna on·na nanga,” ine Das parakataha.
Koela a·kolrango a·sel ong·a changantian a·dok sorkari, niam gri koela bikotaniko jegalrongani a·selsa da·alo indake dal·begipa a·selko chagrongna nangaha ineba ua parakataha.
“A·sel ong·a changantian a·dok sorkari, kalimenggipa nokdangrangna kalimpaanirangkosan, sandirokna ku·rachakanikosan aro tangka paisarangko on·nasan ku·rachakrongaiaha,” ine MPCC-ni general secretary parakataha.
A·doko galchipgimin koela a·damrangko chipataniara neng·begipa kam ong·enga ine Chief Minister-ni agananikoba ua raken jegalataha.
“Uni iandake agananiara namen ra·chakna man·gijani ong·a. A·doko indita bilsirangna niam gri koelarangko bikotaiani giminde iako niamo ong·atna man·jawa maina ian manderangni janggirangko bang·en ra·engaha,” ine Das parakataha.
East Jaintia Hills a·jaosan ong·aigija Meghalaya a·dok gimikon niam gri koela bikotaniko champengna gita ta·raken sandirokchina aro niam gri koela bikotenggipa manderangni kosako maming ja·kurangko de·jahani gimin jak donggipa official-rangni kosako rakgipa ja·kurangko de·china gitaba MPCC dabiangaha.
