Gari gorarang apchangket ong·e neng·nikanirangko chagrongna nangtoka
TURA: Re·anggipa February-ni 5 tarik dipet, A·chik Baptist Krima No. XVII-ni ning·o donggipa Moamari Baptist Mondolio ong·atanggipa A·chik Baptist Dal·gipa Krima (ABDK)-ni chang 152-gipa tom·bimongani, mijal February-ni 8 tarik Robibar attamo, nambee matchotangaha.
Ia chang 152-gipa ABDK-ni tom·bimonganiko, Sastroni Titus 2:11-12-o pangchake, ‘Gisik Srongao Re·ruraani’ ine katta bichongo ong·atangaha.
Robibar salni jinma olakkianiko ong·atanio, Harding Theological College-ni skigipa John Stellon Ch Marak, Nokgipa Isolo bi·anichi a·bachengataha aro Isolni namgipa kattarangko, Council of Baptist Churches in North East India (CBCNEI)-ni Secretary General Rev Dr Namseng R Marak aganangskaaha. Sastro poraiani aro dingtang dingtang nanganirangna ABDK-ni Property Secretary Rev Pudisin Ch Marak-chi bi·angskaaha.
Ia salni olakkianio, sokachakgipa Krimani Choir, HTC Choir, GBC Choir aro Samuel G Momin, Nokgipa Isolna ring·mittele, tom·anio bak ra·giparangko an·saoatangaha.
Ia tom·bimonganio, a·dokni Chief Minister Conrad K Sangma, Opposition dolni dilgipa Dr Mukul Sangma, Tura-ni MP Saleng A Sangma, Meghalaya Legislative Assembly-ni Speaker Thomas A Sangma, Assembly-ni Deputy Speaker Limison D Sangma, dingtang dingtang MLA-rang, MDC-rang aro gipin dilgiparangba dongpae bak ra·angtokaha.
Indake ong·engon, Tura aro Williamnagar-chipakni re·angenggipa gari gorarang, ramarango apchangket ong·ani a·sel bang·a manderangan sobaona somoi gita sokangna man·tokjaha aro bang·batan rama tong·saoni re·bapiltokna nangaha ine koborrangko man·soaha.
Gari salgiparang sengnapgija salani a·sel aro gari bolsa bolgipinko re·badee salani a·sel soba sokna skangan garirang namen apchangket ong·atako man·aha ineba mitam manderang parakataha.
“Chinga pring 7:00 bajimangonin nokoni re·ongkatangahachim indiba ramao garirang apchangket ong·ahani a·sel konta snimangni ja·mansa soba ong·atgipa biapona sokeaha. Gari salgiparang agre sengnapjae salani a·sel aro gari bolgipinko salbadena jotton ka·ani a·selsa indakgipa obostako chagrongna nangaha. Ia manderangara skia man·giparangan ong·achim indiba ramao indakgipa bewalko mesokaniara an·tangtangko skia man·gija gita mesokanisa ong·aha,” ine Tura-oni ABDK soba re·anggipa me·apa saksa parakataha.
Soba re·anggiparangonin dilgittam dilbri dake garirangko salangahani a·sel Tura-chipakna re·baskaenggipa gari gorarangde re·na man·gija dongna nangtokskaaha ineba kobor on·timgiparang parakataha.
