SHILLONG: Adita salrangna skang, East Jaintia Hills a·jani Thangsko jolo donggipa Mynsyngat songni koela a·damo rang·san gopretanichi, manderang bang·en sina nangahani gimin aro bang·en saknaanirangko man·na nangahani gimin ia a·selni bidingo judicial inquiry-ko dakchina a·dok sorkari ge·etangaha.
Koela a·dam gopretanichi da·o dipet sak 27 manderang sina nangaha aro saksku manderang saknaanirangko man·na nangahachim.
“East Jaintia Hills a·jani koela a·dam gopretaniko Commission of Inquiry Act-ni ning·o sandirokna gita a·dok sorkari, Judicial Inquiry Commission-ko songna tik ka·aha,” ine Sombar salo, a·dokni Chief Minister Conrad K Sangma, social media-o parakataha.
Ia koela a·dam gopretanina police-rang, koela a·damni nokgipa sakgni, chong·motan bilsi 36 ong·gipa Forme Chyrmang aro bilsi 42 ong·gipa Shamehi War-ko rim·aha aro uamangko salgittamna police-rangni ning·o donataha.
Indake ong·engon, ia a·selko da·o Meghalaya High Court jako ra·aha aro koela a·damo gimagipa manderangko NDRF, SDRF aro dingtang dingtang dolrang, da·oba sandikuenga ine East Jaintia Hills a·jani Superintendent of Police (SP) Vikash Kumar parakataha.
Ia a·sel ong·aniko High Court ma·sienba da·o jako ra·aha aro iani bidingo East Jaintia Hills a·jani Deputy Commissioner aro SP-ko kachario mikkangpaechina ge·etaniko on·ataha ineba SP parakataha.
Da·o ia case-ko High Court jako ra·ahani gimin uamang iani bidingo mamingkoba agandapna man·jawa ineba SP aganaha.
EJH-o koela a·dam gopretaniko judicial inquiry dakchina sorkari ge·eta
Date:
Share post:
