Sal 7-ni gisepon talataniko on·china u·iata
TURA: Dadenggre jolrango bijoliko sualenggipa SAI Computers Limited, bijolini bill-rangko niam gita tarijaengani a·sel, bijoli jakkalenggipa manderang, nangana bate kajinarangko gamna nangtokenga ine Garo Students Union (GSU) Western Zone (North) Dadenggre matnangatenba, iani bidingo salsnini gisepon talataniko on·china aro bijoli bill tarianiko namdapatchina somoiko on·angaha.
GSU WZN Dadenggre-ni president Tengsan M Marak-ni u·iatani gitade, bijolni bill-rangko niam gita tarijaengani gimin iana skangba uamang, changni chang u·iatahachim indiba da·alonan SAI Computers Ltd, bill-rangko niam gita tarikujaengachim.
“Chingni nikani gitade, nokrangona re·ange nigija aro manderangni nok a·palo meter-rangko dona dongija nichenggijasa bill-rangko tarienga aro iani a·selan bijoli jakkalenggipa manderangna nangana bate bijoli bill-rang sokenga,” ine Marak parakataha.
Iani bidingo changni chang u·iatahaoba SAI Computers Ltd, maming aganchakaniko on·chipkujaenga aro kamrangko namdapatna maming ja·kurangko de·kujaenga ine janapatengon, SAI Computers Ltd-ni iandake mamingkon aganchakgija dongchipaniara, manderangni namgnina kam ka·anio gisik nanggijaniko aro kamko ka·anio parak ong·gijaniko mesokani ong·enga ine GSU WZN Dadenggre-ni president matnangataha.
“Uni gimin salsnini gisepon chingna seachi talataniko on·china aro bill tarianiko ta·raken namatchina chinga somoiko on·enga. Ia somoirangni gisepo SAI Computers Ltd, maming aganchakaniko on·jagenchimode aro bill tarianiko namdapatna ja·kurangko de·ja ong·ode jinma jingjengataniko aro awareness program-rangko ong·atna draatako man·gen ine GSU WZN Dadenggre, mikrakataniko on·angaha.
