‘Ra·chakna man·gijani ong·ode jingjengatgen’
SHILLONG: State Reservation Policy (SRP)-ni bidingo Expert Committee-ni on·gipa report-ko Budbar salo a·dok sorkari, Assembly-o mesoke on·angani ja·man ia report-ko talbate poraina somoiko ra·kugen ine Voice of the People’s Party (VPP) parakataha.
“Expert Committee-ni on·gipa report, ra·chakna man·gipa ong·ode chinga kusi ong·e manigen indiba ra·chakna man·gijagipa ong·ode chinga jingjengatgen,” ine VPP-ni president Ardent M Basaiawmoit, kobor ra·timgiparangna aganaha.
Expert Committee-ni on·gipa Reservation Policy-ni report-ara manderangni nangnikani gita ong·ama ong·ja uko nina gita VPP, talbate poraina somoiko ra·kugen ineba Basaiawmoit parakataha.
Justice (Retd) MC Garg-chi dilanggipa Expert Committee-ni report-ko re·anggipa 2025 bilsini June jaon Meghalaya sorkarina pakwate on·angahachim ine nikna man·a.
A·dokni Reservation Policy-o Khasi-Jaintia-rangna 40 percent, Garorangna 40 percent, gipin Scheduled Tribe aro Scheduled Caste-rangna 5 percent aro unreserved category-na 15 percent-ko chamani dongachim.
Ia Reservation Policy-ko gital dake taripiltaichina dingtang dingtang dolrang dabiahani gimin ia policy-ko nipiltaina gita a·dok sorkari, 2023 bilsio Expert Committee-ko songaha.
