TURA: Re·anggipa Sonibar salo, Tura-ni A·chik Literature Society (ALS), North Eastern Hill University (NEHU) Tura Campus-ni Garo Department, Shillong College-ni Garo Department aro Tura-ni Don Bosco College baksa nangrime, International Mother Language Day-ko Tura-ni Christian Girls’ Higher Secondary School-o maniangaha aro ia program-ko ong·atanio NEHU Tura Campus, ICFAI University, Captain Williamson Sangma State University, Shillong College, Tura Don Bosco College, Tura Government College aro Tura-o donggipa dingtang dingtang institute-rangoni chatro chatrirang, skigiparang aro ki·tap serakgipa manderang bak ra·angtokaha.
Ia program-ko ALS-ni Executive Membor, Dr Dikme Chisil B Marak dilangaha aro program-ko a·bachengatanio, A·chik Ku·rang magazine-ni Editor Dr Jacqueline R Marak-chi Isolo bi·e ja·mano, ALS-ni vice president Dr Colnat B Marak-chi rimchaksoani kattarangko aganangaha.
Ia International Mother Language Day-ko maniani bidingo ALS-ni vice president Dr Dokatchi Ch Marak, talate on·angengon, an·tangtangni ku·sikrang baksana dingtang dingtang ku·sikrangko skie ra·na nangani gimin aganangaha.
Ia tom·anio, NEHU Tura Campus-ni Garo Department-o poraienggipa chatro chatrirang, gitko ring·anichiba ia program-ko mikkim dongbatataha. Ia tom·anio, Dr Rosa Mary Ch Sangma-ni pe·skagipa ‘Match Bi·sani Golpo’ ki·tapkoba ALS-ni vice president-rang, oprake on·angjolaha.
Ia program-ko ong·atanio, ALS-ni joint secretary Dr Bilnang K Sangma, ki·tap segipa Chenggan A Sangma, State Literary Award-ko man·gipa Kroshnil D Sangma, ALS-ni Executive Membor Basan R Marak, Chimik aro Jarongpang magazine-ni Editor Melkior Ch Sangma, Captain Williamson Sangma State University-ni ning·o donggipa Garo Department-ni Head, Dr Barbara S Sangma, Shillong College-ni HoD Lorinda D Marak aro ALS-ni president Prof Caroline R Marak, dingtang dingtang katta bichongrangni gimin tom·anio bak ra·giparangna agan-talatanirangko on·angaha.
Bon·kamao ALS-ni secretary Dr Crystal Cornelious D Marak aro gipin dilgiparang, ia program-o bak ra·giparangna certificate-rangko sualatskaaha.
