SHILLONG: Re·anggipa Bristibar attamo, Shillong-ni MP Ricky AJ Syngkon-ni ga·akgropani somoio, Mawlai Mawiong Community Health Centre (PHC)-o doctor dongjachim ine matnangenggipani bidingo inquiry dakani report-ko a·dok sorkarina on·angaha aro ia report-ko da·o sorkari niengkua.
Health official-ni u·iatani gitade, ua somoio Mawlai Mawiong PHC-o doctor dongja ine matnanganiko sandirokna gita District Medical & Health Officer (DMHO)-na ge·etaniko on·aha aro iani bidingo sandirokenba da·o report-ko sorkarina on·angaha.
Ua somoio Mawlai Mawiong PHC-ni nurse-rang aro gipin kam ka·giparang, niamrangko ja·rikenba, an·tangtangni dakna nanganirangko dakaha aro ja·mano Shillong MP-ko nambata hospital-ona ra·angchina u·iataha ineba health official aganaha.
Iani bidingo talbate aganna gita jechakangengon, ia report-ko sorkari nimanahaon, jinmaba kakketko ma·sina man·aigen ine Health official parakataha.
Re·anggipa February 19 tariko, Shillong-ni MP Ricky AJ Syngkon-ni tanggitik sianganiara a·dokni manderangna kalimaniko aro a·dokni health centre-rango kam ka·giparangni, mongsongbate doctor-rangni chu·ongjaengani gimin sing·doanikoba ong·katatahachim.
February 19 tarik attamo, Shillong-ni MP, an·tangni ripengskarang baksa Ratson Arena Futsal Ground-o robol kal·e roengmitingo rang·san ga·akgrope sibokangahachim. Mikrongtangchi nikgipa manderangni u·iatani gitade, uni ga·aka bakan ua biapo donggipa manderang, 108 ambulance service-na ka·atahachim indiba ambulance ja·manchakbaahani gimin uko manderangni gariosa Mawlai Mawiong PHC-ona ra·angna nangaha.
Uko sanna gita PHC-ona ra·angon, uano doctor dongjae, nurse-rangsa uko niaha aro ja·mano uko gipin hospital-ona ra·angchina aganataha ineba mikrongtangchi nikgipa manderang parakataha.
Mawlai Mawiong CHC-o doctor dongja ine matnanggipani inquiry report-ko sorkari nienga
Date:
Share post:
