Garorangni bak rengsiko komiatna miksongani dongja: Basaiawmoit
SHILLONG: State Reservation Policy (SRP)-ni bidingo sorkarini songe on·gipa Expert Committee-ni report-ko Budbar salo, Nongkrem-ni Voice of the People’s Party (VPP) MLA Ardent Miller Basaiawmoit jegalatenba, Reservation Policy-ko gital dake nipiltaina nanga ine dabiangaha.
Iani bidingo Assembly-ni budget session-o chanchirimaniko ra·baengon, Reservation Policy-o Garorangna 40 percent chamaniko komiatchinade uamang dabienga ong·ja indiba Khasi-Jaintia-rangna 47 percent-ko chame, niam dongimin 50 percent-ni ning·on chu·gimik reservation-ko rakkichinasa dabienga ine Basaiawmoit aganaha.
Reservation Policy-ko gital dake nipiltaichina dabianiara Garorangna on·gimin bak rengsiko komiatna miksonge dabienga ong·ja indiba Khasi aro Jaintia Hills a·jarango ong·enggipa obosta aro nangani krisa dabienga ineba VPP MLA aganaha.
1972 bilsini Reservation Policy-ko taridapgija skango gitan apsan ong·e donchina Expert Committee-ni ku·pattianiko knasoe Khasi aro Jaintia Hills a·jarango bang·a manderangan suk ong·jaha ineba ua aganaha.
Kacharini nipilanio chu·sokna man·jawa ine kenesa Reservation Policy-ko skango gitan donkuchina Expert Committee-ni report-o ku·pattianiko on·ahakon ine janapatengon, “Ian niamrangko aro policy-ko tarigipa Legislature-sa ong·a aro bang·bata changon sorkarini niam tarianikode kacharini gita champengani dongrongja,” ine VPP MLA parakataha.
1972 bilsio tarigipa reservation policy-ni bidingo janapatengon, ua somoio kamrangko ka·gipa dingtang dingtang jatrango manderang chu·ongjani giminsa aro sorkarini kamrangko rakkina nangani giminsa Indian Constitution-ni Article 16 ning·o donggipa Clause (4)-o tariaha ine Basaiawmoit parakataha.
Kamna kragipa candidate-rangko man·jagenchimode ua kamko bilsi gipinona ra·doangchina gita Reservation Policy-o dongimin niamni bidingo janapatskaengon, ia niamko name ja·rikgenchimode, da·alo ong·enggipa obostarangko chel·chakna man·naba gnangchim ine Basaiawmoit aganaha.
Kacharini ge·etaniko man·e roster system-ko a·bachengatani ja·mansa neng·nikanirangde sokbaaha ineba ua aganaha.
“Skia man·e kamgri ong·e dongenggipa chadamberangni neng·nikanirangko nike, Khasi-rangna reservation-ko bariatchina Expert Committee ku·pattigen ine chinga ka·dongengachim,” ine VPP MLA aganenba, Khasi-Jaintia-na reservation-ko 7 percent-chi bariataniara chu·ongjagenchimba ian obostako namkalatna dakchakgenchim ine parakataha.
Expert Committee-ni report-ko sorkarina on·aoni jachetni ja·mansa report-ko parakahani gimin an·tangni suk ong·gijaniko parakatengon, batanggimin somoirangnade roster system-ko jakkalchina gita Basaiawmoit, a·dok sorkariko didiangaha.
Ian jatsa jatgipinni kosako chakatani katta ong·ja ine talataniko on·angengon, “Anga darang jatni kosakoba ong·gija miksonganio iako dabienga ong·ja indiba chadamberangni kamgri ong·e dongako nikesa ku·rang on·enga,” ine VPP MLA aganaha.
