TURA: Re·baenggipa April jani 10 tariko ong·atenggipa Garo Hills Autonomous District Council (GHADC) election-na skang, Electoral roll-rangko gital dake nipiltaina Special Intensive Review (SIR)-ko ong·atchina didie A·chik Conscious Holistically Integrated Krima (ACHIK), Union Home Minister Amit Shah-na sedoataha.
Re·anggipa January jani 9 tariko ACHIK-ni membor saksa Dilseng M Sangma-ko Rajabala jolo so·ote galani ja·man, GHADC-ni electoral roll-ko gital dake nipiltaichina ACHIK dabiangaha.
“Ia a·sel ong·aniara da·osan ong·enga ong·ja indiba ian gipin biaprangoni Garo Hills-ona niam gri napsrukbaani biteko mesokanisa ong·enga. Niam gri napsrukbae songdong a·chaenggiparangko bilake nirokanirang aro sandianirang dongjaengani a·sel Garo Hills-o gipin jatrangni jelbra jelsuaniko nikna man·engaha. Iandake gipin biaprangoni napsruke songdong a·chaaniara, Tribal jatrangni a·a-chiarangko aro jatni daka rikanirangko gimaatasan ong·aigija ian Autonomous District Council-ni election-rango Tribal ong·gijagipa manderangna bak ra·pana cholrangko on·ani gitaba ong·enga,” ine Union Home Minister-na sedoatgipa chittio ACHIK parakataha.
Indake ong·engon, Garo Hills-o tom·tomaniko rakkiangna aro niam retirangko nambate nirokna man·na gita iani bidingo nirokatchina aro GHADC election-ko name ong·atna man·na gita electoral roll-rangko Special Intensive Revision dakna ge·etaniko on·china ACHIK, Union Home Minister Amit Shah-ko didiataha.
