Khasi-Jaintia-rangna 50 percent chamchina dabia
SHILLONG: Meghalaya a·dokni State Reservation Policy (SRP)-ko a·bachengo tarigimin gitan apsan ong·e donangkuchina Expert Committee-ni report-o on·gipa ku·pattianiko Khasi Students Union (KSU) jegalatenba, Reservation Policy-o Khasi-Jaintia-rangna 40 percent chamaoniko 50 percent-ona bariatchina dabiangkuaha.
1972 bilsio tarigipa Reservation Policy-ko apsan daken donangkuchina Expert Committee-ni ku·pattie on·aniko jegalatengon, Khasi-Jaintia Hills a·jarango skangona baten manderang jelbra jelsubatahani gimin ia apsan policy-ko ja·rikangkuaniara kragijani ong·enga ine KSU-ni president Lambokstarwell Marngar parakataha.
Batanggimin bilsirango manderang jelbra jelsubatahani gimin Khasi-Jaintia-rangna 50 percent-ona bariatanikosa nangenga ine janapatskaengon, Garorangna 40 percent chamaniko komiatgija Khasi-Jaintia-rangna 50 percent-ona bariatanikosa uamang dabienga ine Marngar parakataha.
Expert Committee baksa tom·e chanchirimanirango dingtang dingtang dolrang, an·tangtangni nangnikanirangko u·iatahachim indiba uamangni agan-ku·pattie on·aniko committee ra·jaha ineba KSU president matnangataha.
A·dokni Reservation Policy-ko bilsi 50-na skangsa tariahani gimin ia apsan niamko da·o ja·rikkuaniara ra·chakna man·gijani ong·enga ineba ua aganaha.
Iani bidingo KSU-ni Central Executive Council, tom·aniko ong·atangenba, gitcham Reservation Policy aro Expert Committee-ni report-ko nipilanggen aro uni ja·man ja·ku de·ani bidingo chanchianggen ineba KSU president parakataha.
Indake ong·engon, Reservation Policy-ko nipilna gita sorkarini songe on·gipa Expert Committee, a·dokni pilak biaprangon, dingtang dingtang jatrang aro dolrang baksa chanchirimesa report-ko on·ahani gimin committee-ni ku·pattie on·a gitan apsan niamkon ja·rikangkuna nanga ine a·dokni Bharatiya Janata Party (BJP), chakpaaniko parakatskaaha.
BJP-ni state general secretary Wankitbok Pohshna-ni parakatani gitade, uamang Shillong aro Garo Hills-ni nangnikanirangko nichengenba a·bachengon committee-na an·tangtangni nangnikanirangko u·iataha. Iani bidingo chanchidapna nanganirang dongjaha ineba ua BJP-ni nangnikaniko parakataha.
Chu·gimik biaprangko chamani 50 percent-na batna nangja ine kacharini ge·etaniko janapatengon, iana batgenchimode ja·mano a·dokni reservation policy-ko den·galpilani cholrangba dongaia ine Pohshna parakataha.
Expert Committee-ni ku·pattigimin gitan reservation policy-ko tarianio, mande jelbra jelsubatanikode nina man·jawa indiba jatni nangani krisa ong·na nangaia ineba ua aganaha.
