TURA: Skulo poraienggipa bi·sarangna dakchakanirangko on·na gita West Garo Hills Autorickshaw Association (WGHAA) Dermile unit-ni membor-rang, dingtangmancha Tura Reserve Gittimo donggipa Baldora SSA Lower Primary skulo poraiengipa bi·sarangna Nursery-oni Class V-ona admission ka·e on·angan baksana skulo skigiparangni jakkalna nanggipa dingtang dingtang bosturang aro bi·sarangni jakkalna nangenggipa bosturangkoba on·gilangaha.
Ia charity program-ko ong·atani bidingo WGHAA Dermile unit-ni advisor Civil D Sangma talate on·angengon, ia skulo poraienggipa bi·sarangna aro skigiparangna uamangni dakchake on·aniara maming dakeba politics-ni kam ong·ja indiba bi·sarangko poraianio gisik nangchina aro mikkangchi chu·sokanggiparang ong·china didiani gitasa ong·enga ine parakataha.
Ia unit-ni membor-rang, an·tangtangni gisepo saksa sakgipinna dakchakgrikana agrede ian skanggipa changna iandake skulo poraienggipa bi·sarangna aro skigiparangna dakchake on·ani ong·enga ine talataniko on·angengon, mikkangchiba uamang cholgri ong·gipa manderangna aro chatro chatrirangna dakchakanirangko on·angkuna miksongenga ine Sangma parakataha.
Sangma-ni u·iatani gitade, WGHAA Dermile unit-ni membor-rang, an·tangtangni chimonggimin tangka paisarangoniko, ia skulo poraienggipa bi·sarangna aro skigiparangna dakchake on·na gita koros ka·aha.
Skulo poraienggipa bi·sarangna admission ka·e on·an baksana bi·sarangni nanganirangko aro skigiparangni dingtang dingtang nanganirangko on·ahani gimin Baldora SSA LP skulni bi·sarang aro skigiparangba, WGHAA Dermile unit-ko mittelpilangskaaha.
