TURA: Meghalaya a·dokni gitcham Chief Minister aro Lok Sabha-ni gitcham Speaker Purno A Sangma sagini chang 10-gipa siani salko Budbar salo gisik ra·e, Tura-ni Dakopgre-o donggipa PA Sangma Sports Complex-o maniangaha aro ia salko manianio, PA Sangma Museum-koba oprake on·angjolaha.
Ia program-ko ong·atanio, Meghalaya Legislative Assembly-ni Speaker Thomas A Sangma, Tura-ni gitcham MP Agatha K Sangma, dingtang dingtang dilgiparang aro jolo songdongenggipa manderangba dongpae bak ra·angtokaha.
Ia tom·aniko ong·atanio, Meghalaya Assembly-ni Speaker Thomas A Sangma, jinmana aganprakangengon, PA Sangma sagini janggi tangani bidingo aro niksamsoani gnang, a·songko kakket aro bebeo re·dilahani gimin janapangenba, ua an·tangba unbaksa ja·rike, bang·en namgipa kamrangko aro gunrangko uoniko skie ra·pana chol man·aha ine parakataha.
PA Sangma sagini jatko aro a·songko re·dilanio, uni tikkelani, ka·dongani aro kakketo re·mikkanggipa ong·ani gimin janapangengon, janggi tanganio je dakgipa gadangoba ong·ja maina, PA Sangma sagi gita dakgipa dilgipani namgipa gunrangko ja·rike, a·songna aro jatna dangdike on·giparang ong·china Thomas, mande sakantikon didiangaha.
Ia tom·anio, Tura-ni gitcham MP aro Purno A Sangma sagini demechik Agatha K Sangma-ba jinmana aganprakengon, PA Sangma sagini siani bilsi 10 gapaniko gisik ra·e manianio, PA Sangma Museum-ko oprake on·na man·ahani gimin aro ia salko manianio dongpae bak ra·angahani gimin uni nokdangni pal, ua program-o bak ra·gipa mande sakantikon mittelpilangaha.
PA Sangma Museum-o uni chonmiting salrangoni, a·songna dangdike on·angmiting somoirangona kingking, uni chu·sokatanggipa kamrangko, uni noksarangko aro uni namnikgipa bosturangko manderangna mesokna gita donangaha.
