SHILLONG: Electoral roll-rangko Special Intensive Revision (SIR) dakanichi, voter ba pu·ongiparangko name nipiltairongani gimin voter-rangni bimingko name rakkina man·a ine a·dokni Chief Electoral Officer (CEO) BDR Tiwari parakataha.
Bristibar salo, East Khasi Hills a·jani Mawphlang-o donggipa Jawahar Navodaya Vidyalaya (JNV)-o Electoral Literacy Club (ELC)-ko a·bachengate on·angani ja·man jinmana aganprakangengon, electoral roll-rangko gital dake rakkina aro ka·dongna man·gipa ong·atna SIR-ko dakna nangchongmota ine CEO aganaha.
Ia ELC-ko Systematic Voters’ Education & Electoral Participation (SVEEP) program-ni ning·o a·bachengataha.
Skangrangoba SIR-ko Meghalaya aro dingtang dingtang biaprango dakaha ine janapatengon, ia revision-ko a·songni pilak biaprangon, gadang gadang dake dakronga ine CEO talataniko on·angaha.
SIR-ko dakanio, electoral roll-rangko name rakkina gita voter-rangni nangchongmotgipa lekkarangko name nipilronga ineba Tiwari aganaha.
SIR-ni bidingo manderang ma·sisretjana gita, iani bidingo name ma·sie ra·chengenba, sakgipinrangnaba u·iatskachina a·dokni CEO, ELC-ni membor-rangko didiataha.
A·doko SIR-ko a·bachengahaon, ELC-ni membor-rang an·tangtangan songni nokni volunteer-rang gita kam ka·na man·gen ineba ua aganaha.
Chadamberangan mikkangchi a·songko dilnagiparang ong·a ine janapatengon, chadamberangan a·gilsako dal·batsranggipa democracy-ko mangrakbatatanio mongsonggipa daitorangko ka·giparangba ong·a ine CEO parakataha.
