GH-oni badingchiwalrangko chel·chakchina ASPF, Assam CM-ko mol·molata

Tura: Assam-ni sima ari jolrango Garo Hills-oni A·chik badingchiwalgiparangni naljokanina chanchina nanggipa ong·ani gimin A·chik State People’s Front (ASPF) uamangni chel·chakaniko nangnike Assam-ni Chief Minister Himanta Biswa Sarma-na chittiko seataha.
March 7 tariko CM-na chittio ASPF indake janapataha, Meghalaya-ni sima ari Assam jolni biaprango dingtangmancha South Salmara, Dhubri aro Goalpara district-rango so·sojengjeng ong·a dal·roroengani bidingo chanchina nangenga.
“Ian chingni ma·sianiona sokbaaha, jeon Garo jatni manderang neng·nikanirangko chagrongenga uan Assam-ni gisepgriko badingchiwalanio bakrimna uamang neng·nikaniko man·enga. Koborrangko man·soaha, Mankachar jolo badingchiwalgipa me·chik dol Tura-ona bosturangko ra·e re·angmmiting somoio chadrapako man·aha jeon uamangni bosturangko ma·sigijagipa dol ka·namgija nosto ka·e galtokaha. Apsan dakgipa a·sel Krishnai, Goalpara-oba ong·aha jeon mesu samjak badingchiwalgipa manderangko community-n member-rangchi nisan donako man·aha,” ine general secretary Bernita Marak seataha.
Chonchongipa badingchiwalgiparang da·ororo bilongen neng·nikanirangko man·engaha aro Goalpara district-ni Lakhipur, Rongsai, Krishnai-oni aro South Salmara-o Mankachar, Harsingimari-oni neng·nikaniko man·enggiparangoniko koborrangko man·soaha, ine ASPF dol janapataha.
Ong·gijagipa koborrangko social media-rango video-rangko gipate neng·nikatanirangko ra·baenga jeon Garo community-na meli-nangrimanio neng·nikaniko ra·baa aro jatsa jatgipin mikkang baseaniko daka ine uamang agandapangaha.
Garo badingchiwalgiparangoniko ia district-rango napna tangka hajal 20-ko dabian baksanaba jatni gisikko sa·dikatna jotton ka·an baksa ong·gija dake chonike matnanggipa video-o mesokataha, ine ASPF aganangaha.
“Uamang Assam a·doko ong·engona Meghalaya-ni manderangko naljokatna aro badingchiwalaniko bilakdapatna ja·ku de·atpachina nang·ni office-ko chinga mol·molata,” ine Marak aganaha.
Jedakgipa a·selrangko kobor on·angna dakchakani helpline-ko a·bachengatchina CSO namnike ra·baaha, jeon kosako janapgipa biaprango niam reti-ko bilakdapate chel·chakgipa sipairangko dona, neng·nikataniko on·gipa manderangni kosako kragipa ja·ku de·na aro ma·siangna aro social media-ko jakkalgiparangni kosako jemangan ka·onganiko, chonikaniko aro ong·gijagipa koborrangko gipenggiparangni kosako bilakgipa ja·ku de·na nanga ine janapangaha.