SHILLONG: Adita salrangna skang, Meghalaya Democratic Alliance (MDA) sorkarini bilsichet gapaniko Tura-o manianio, sorkarini tangkarangchin sorkari program-ko ong·atahaoba, National People’s Party (NPP)-kosa chuatna jotton ka·aniko nikna man·aha ine Hynniewtrep Youth Council (HYC) matnangataha.
MDA sorkarini bilsichet gapahani gimin an·tangni namgipa skaniko on·atengon, MDA sorkarini bilsichet gapaniko manianio, NPP-ni nisan dakanggipa rongrangkosa pandal-rango, decoration-rango aro Chief Minister baksana gipin minister-rangni gangipa jacket-rangoba mesokaha ine HYC-ni president Roy Kupar Synrem matnangatskaaha.
“Ian manderangni tangka paisarangko jakkale ong·atgipa sorkari program-sa ong·achim indiba ia program-o NPP-kosa mesokna jotton ka·aniara namen kraani ong·ja aro sing·doako man·na krachongmota,” ine HYC parakataha.
Sorkarini program-rangkode political-ni gita nangatena nangja ine janapatengon, iandakgipa sorkari program-rangode, badiaba political party-kosan mesokna nangja ine Synrem parakataha.
Sorkari program-rang aro party program-rangni gisepo pangnan dingtanggrikani dongna nanga ineba HYC didiataha.
Badiaba party-ni nisanrang baksa apsananggipa rongrang, noksarang ba taritilonganirangko sorkarini program-rango jakkalani ba mesokaniara namen kragijani ong·a ineba Synrem parakataha.
