GHADC election-o susana ST certificate nanggen ine u·iataniko High Court den·gala

SHILLONG: Garo Hills Autonomous District Council (GHADC) election-o susana gita Scheduled Tribe (ST) certificate dongna nanggen ine re·anggipa February-ni 17 tariko, GHADC-ni u·iataniko Mongolbar salo, Meghalaya High Court-ni hearing dakanio den·galataha.
GHADC-ni u·iataniko ra·bienba, Rajabala Police Station-ni ning·o donggipa Namabilla songni Enamul Hoque minggipa mande saksani badi ka·ani bidingo hearing-ko dakani ja·man iako Meghalaya High Court-ni Justice Hamarsan Sing Thangkhiew-ni single bench rai on·angaha.
Badi ka·gipa mandeni pal High Court-ni Senior Advocate K Paul mikkangpaengon, Assam and Meghalaya Autonomous Districts (Constitution of District Councils) Rules, 1951-ni Rule 128 aro Rule 8-o Garo Hills-o songdongkamgipa Non-Tribal-rangba GHADC election-o bak ra·pana man·a aro niamko dingtangatna nanggenchimode Rule 72-ko ja·rike, skanggipa Executive Committee-ni draft rule-ko District Council ra·chakani ja·man a·dokni Governor-ba ra·chake, u·iataniko on·chengna nanggen ine High Court-na aganaha. February-ni 17 tariko Executive Council-ni u·iataniara ia niamko re·badeaha maina ia u·iataniko Governor-sa ra·chake u·iatchengna nanga ineba ua aganaha.
District Council-ko songchengaonin aro niamrangko tarichengaonin electoral roll-rango biming dongpagipa Non-Tribal-rangba da·alona kingkingan jakgitele pu·onenga aro GHADC-ni membor ong·e dangdike on·aha ineba ua jegrikaha.
“Uni gimin Governor-ni ra·chakaniko man·chenggija aro u·iatchenggija GHADC-ni niam tarianiara ainni a·palo ong·a,” ine Paul aganaha.
GHADC-ni pal ukil saksa S Dey, Rule 29(a)(b) aro Rule 30-ni ning·o aganchakaniko on·angskaengon, Assam and Meghalaya Autonomous Districts (Constitution of District Councils) Rules, 1951-ni bidingo janapatenba, iani ning·o Autonomous District Council-rangko chalaianio, niamrangko tarina gita proposal-ko ra·bana Executive Committee-na bilko on·a ine parakatskaaha.
Dey-ni aganani gitade, Council-o session-ko ong·atjaengmiting somoirango maiba nanggitikan kamrangko jako ra·na gita Rule 30-ara Executive Committee-na bilko on·achim.
A·dok sorkarini pal Advocate General Amit Kumar-ba High Court-o mikkangpaengon, GHADC-ni u·iataniko on·anio Governor-ni ra·chakani dongja aro Rule 128-ko taridapna nanga ine aganaha.
Rule 72(2)-ni bidingo janapatengon, District Council-ni ra·gatgipa niamrangko skanggipa District Council Affairs (DCA) department-ona watatna nanga aro uni ja·man ia niamrangko Governor-sa ra·chakchengna nanga ine Kumar aganaha.
Sixth Schedule-ni paragraph 2(6) aro 2(7) baksana 1951 Rules-ko niangani ja·man, Executive Committee-de niamrangko taridapna proposal-kosa ra·bana man·aia aro niamko tarina man·ja ine High Court-ni Justice Thangkhiew parakatenba, GHADC-ni ra·gatgipa niamko den·galataha.